Balei ka jingai kiwei kiwei ki bam ka dei ka kam kaba kongsan ban pynduh ïa ka jingbym ïoh ki khynnah ïa ka bam kaba tei

New Delhi, Risaw 08 : Ha une u Risaw, ka India ka la rakhe ïa kaRashtriyaPoshanMaah 2024 kaba 7, u bnai uba long kyrpang na ka bynta ka jingai jingtip bad ki sienjam shaphang ka jingïoh ïa ka bam kaba tei, ka bynta kaba kongsan kaba ngi hap ban peit bha ka dei ka jingai kiwei kiwei ki jait bam. Ka jingpynkylla ïa ka jingai bam ïa ki khyllung na ka jingai buin sha ka jingai kiwei kiwei ki jait bam ka kynthup ïa ki bam kiba jem bad kiba kham eh bad ka long kaba donkam bha na ka bynta ka jingpynbeit ïa ka jingeh kaba don ha India kaba ïadei bad ka jingbym ïoh ki khynnah ïa ka bam kaba tei.
Ka jingai kiwei kiwei ki bam kam dei tang shaphang ki jingbam; ka dei ka jingpynthikna ba ki khynnah ki ïoh ïa ki jingtei met bapher bapher ha ka por kaba biang, kaba buh ïa ka nongrim jong ka jingim kaba koit ba khiah bad kaba seisoh. Namar ka jingai tang ka dud kam lah ban pyndap ïa ki jingdonkam jong ka met jong ki khynnah ba dang heh dang san, ka World Health Organization (WHO) ka la ai jingmut ban sdang ai ïa ki jaitjingbam kiba tei ïa ka met bad kiba shngain naduh ba dang 6 bnai ka rta ha ryngkat ka jingbteng jong ka jingai buin haduh ynda la dap 2 snem ne hadien kane ruh.
Ka jingai kiwei kiwei ki jait bam ka long kaba kongsan na ka bynta ka jabieng, ka jingheh ka met bad ka jinglah ban ïaleh pyrshah ïa ki jingpang. Ki sakhikatkum ka jingstad science shaphang ka jingtei ïa ka jabieng ki pyni ba hapoh ar snem ba la kha, ka jingheh jong ka jabieng ka kiew palat 100%.
Kumjuh, ha u snem ba nyngkong, ka jingkhia jong ki khyllung ka kiewjanlai shah. Kumta ka jingai kiwei kiwei ki bam ka long kaba kongsan na ka bynta ka jingtei ka jabieng bad ruh ha ka jingïada na ka jingrit met ki khynnah – kaba ju ktah ïa jan iwei na man ki lai ngut ki khynnah kiba hapoh san snem ka rta ha India. Ka jingduna ka jingtei met ki khynnah kaba kynthup ïa ka jing samah, ka jingduna ka jingkhia ka met ka lah ban ktah ïa ka jinglong ka met bad ka jabieng jong ki khynnah ba dang heh dang san. Kum ban shu kdew ki jingwad bniah ki pyni ba ki khynnah ba rit met ki lah ban kham duna ha ki jingpule, ki jingsngewthuh bad ka ïoh ka kot haba ki la heh.
Shuh shuh, ka jingai kiwei kiwei ki bam ka long kaba donkam ban tei ïa ka met kaba lah ban ïaleh pyrshah ïa ki jingpang. Ka ïarap ban ïada na ki jingpang ïabit kum ka jingpynhiar, ki jingpang pynhiar mynsiem bad ki jingbym ïahap ïa ki jait bam bapher bapher, kiba ju jia bha ha ki khynnah. Ki ar snem ba nyngkong ha ka jingim jong ki khynnah ki long ka por kaba kongsan bha ha kaba ka jingïoh ïa ka bam kaba tei ka lah ban kyntiew ïa ka jingheh jingsan, ka jingsngewthuh bad ka jinglah ïaleh pyrshah ïa ki jingpang wat ïa ki pateng ban wan ruh. Kane ka dei ka por kaba kongsan bha ha kaba ka jingïoh ïa ka bam kaba bun vitamin, ka lah ban don ka jingktah kaba heh ha ka jingim jong ki khynnah.
Watla ka long kaba kongsan, ka jingai kiwei kiwei ki jait bam ha India ka long kaba duna bha. Ki jingtip kiba ïoh na ki khanasamari ha ka ri halor ka koit ka khiah jong ki longiing ka pyni ba ka don ka jing duna ha ka jingai kiwei kiwei ki jait bam ïa ki khynnah bad ngi dei ban peit bha ïa kane ban ïaleh pyrshah ïa ka jing duna ka jingkhia met. Ka dei hangne ba ka jingpeit bniah ka tnad Women and Child Development ïa ka jingai kiwei kiwei ki jait bam hapoh kaRashtriyaPoshanMaah (National Nutrition Month) 2024, ka la long kum u mawmer ha ki kam jong ka India kiba ïadei bad ka koit ka khiah.
Kane ka ïalam ïa ngi sha ka jingkylli: Kaei ba ngi lah ban leh ban kyntiew ïa ka jingpdiang ïa ka jingai kiwei kiwei ki jait bam ïa ki khynnah rit ha India?
Kaba nyngkong bad kaba kongsan tam na ka bynta ka jingjop jong ka jingai ïa kiwei kiwei ki jait bam ka dei ka jingai ïa ki bam kiba tei met khamtam ha ka por ba ki khynnah ki dang don hapdeng hynriew bnai bad ar snem ka rta. Ki rukom bam ba ïar jong ka India ki wanrah shibun ki lad ki lynti kiba ïahap bha ïa ki khynnah rit. Ki jait bam tynrai kum ki khichdibad daliya, ki long kiba suk ban pynkhreh bad ki dei kiba bun ki jintei met. Kum ban shu kdew, ka Ragi banana porridge ka dei kaba bun bha ïa ka iron bad calcium katba ka Bajra Khichdi ka don ki mineral bad vitamin. Ki rukom treikam ka tnad Women and Child Development na ka bynta ka Mission Poshan 2.0 ki ban jur halor ka jingkyntiew ïa ka rukom bam ‘ba bun bynta’ bad ka jingbam ïa kisoh, ki jhur, ki krai bad kiwei kiwei ki jait bam kiba pahuh ha ki jaka sah jong ki briew, kiba tei ïa ka met bad kiba ïahap bad ki jinglong jingman ha kine ki jaka. Ka jingwanrah biang ïa ki rukom bam tynrai na ka bynta ki khynnah rit kiba ïoh na ki bam kiba don ha ki jaka bapher bapher bad ki ba jemdor ka lah ban pynthikna ba ki khynnah ki ïoh ïa ka bam kaba pynbiang lut ïa ki jingdonkam jong ka met bad kaba kyrshan ïa ka jingheh jingsan jong ki.
Ha kaba ar, ka jingpyndonkam ïa ki rynsan ha ka imlang sahlang ban ai ïa ki khubor katkum ka jingstad science ka lah ban long ka rukom treikam kaba biang bha ban wanrah ïa ka jingkylla ha ka rukom pyrkhat bad ka rukom im. Ka jingai jingmut ka WHO ban sdang ai ïa kiwei kiwei ki jait bam hadien ba la dap hynriew bnai ki khyllung ka ïahap bha bad ka rukom ‘Annaprashan’ kaba hyndai, kaba long ruh kum u mawmer ha ka deiriti jong ka India. Da kaba ithuh ïa ka jingkongsan jong ka jingai kiwei kiwei ki jait bam, ka tnad Women and Child Development ka kyntiew ïa ka jingrakhe ïa ka Annaprashan Divas kum ka jingrakhe ha ka imlang sahlang ba pynlong da ki nongtrei Anganwadi ha kylleng ka ri ban ïasyllok ïa ki kmie bad ki briew shaphang ka jing kongsan jong ka jingai ki jait bam bapher bapher ïa ki khynnah rit. Ka jingpyndonkam ïa ki jingnang jingstad tynrai bad ki rukom im ha ka imlang sahlang na ka bynta ka jingai jingtip katkum ka jingstad science ka dei ka rukom treikam kaba biang tam ban kyntiew ïa ka jingpdiang ïa ki rukom ai bam kiba ïarap bha ïa ki khynnahkhyllung.
Ha kaba lai, ban pynthikna ba baroh ki khynnah rit ki ïoh ïa ka bam kaba tei ïa ka met, ka long kaba donkam bha ban pyndonkam ïa ki prokram jong ka Sorkar kiba la don lypa. Ka Supplementary Nutrition Program (SNP) jong ka tnad Women and Child Development ka pynbiang ïa ki Take-Home Rations (THR) bad Hot Cooked Meals (HCM) ïa ki khynnah kiba hapdeng hynriew bnai bad hynriew snem ka rta, bad kane ka ïarap bha ïa ki longiing, khamtam kito kiba dang duna ka ïoh ka kot, ba kin ïoh ïa ki bam kiba tei ïa ka met jong ki khynnah khyllung.
Ha kaba saw, haba kyntiew ïa ki bam kiba tei ïa ka met, ka long ruh kaba donkam ban ïada ïa ki khynnah na ki jingbamkai, khamtam kito kiba bun ka khlein, ka shini bad ka mluh. Ki jingbamkai kum ki biskit, ki chips, ki namkeen, instant noodles, ki umsoh bad kiwei kiwei ki la long shi bynta jong ki bam ba ki khynnah ki bang bha. Shuh shuh, ki jingbamkhyllung kiba ïaid iew bha ki la ïakynduh jingeh na ka National Commission for Protection of Child Rights namar ka jingbun ka shini, khamtam kito kiba die bha ha India. Kumta kam long kaba lyngngoh ba ka jingïaid iew ki jingbamkai ha India ka la kiewna u snem sha u snem. Ki jingshemkatkum ka jingstad science ki pyni ba ka jingai ïa kine ki jait bam bym tei ïa ka met ka lah ban ïalam sha ka jingsngaid palat, bad ka jingpang shini kiba wanrah ïa ki jingpang bapher bapher katba dang ïaid ki snem. Kumta ka long kaba donkam bha ban ai jingtip shaphang ki jingktah jong kine ki jaitjingbamkai bad ruh ban pynshlur ïa ki kmie ki kpa ba kin ai da ki jingbam kiba tei ïa ka met. Ngi lah ban leh ïa kane da kaba ai jinghikai ha ka imlang sahlang, ki media campaign bad ka jingïashim bynta ki nongai jingsumar bad kito kiba trei na ka bynta ka koit ka khiah ha ka imlang sahlang kiba lah ban ïasyllok bad ki kmie ki kpa shaphang ki rukom ai bam kiba ïahap.
Ha kaba kut, ka jingai ïa kiwei kiwei ki bam ka dei ka bynta kaba heh jong ka PoshanMaah 2024 kaba 7 kaba peit ïa kane ka bynta jong ka jingïoh ki kmie bad ki khynnah ïa ka bam kaba tei. Da kaba kyntiew ïa ki rukom im kiba don nongrim ha ki jingshem, ka jingpyndonkam ïa ki rukom tynrai kum ka Annaprashan, ka jingai ïa ki rukom pynkhreh ïa ki bam kiba suk ban ïoh bad kiba jemdor bad ka jingïada ïa ki khynnah na ki jingbamkai, ka India ka lah ban jam shaphrang ha ka jingïakhun jong ka ban pynduhjait ïa ka jingrit met. Ki sienjam jong ka Sorkar ha ryngkat ka “Jan Andolan” lane ka jingïatreilang ki paidbah, ka lah ban pynthikna ba baroh ki khynnah ki ïoh ïa ka bam kaba tei kaba ki donkam ban kiwei shaphrang bad kane kan buh ïa ka nongrim kaba skhem ïa ka ri.
Nongthoh: Dr.Ananya Awasthi ka dei ka nongwad bniah ha ki kam kiba ïadei bad ka koit ka khiah ki paidbah bad ruh ka director jong kaAnuvaad Solutions –ïa kaba la saindur ban pynkylla ïa ki jingshem katkum ki jingstad science sha ki sienjam polisi.