Shillong, Nohprah, 11: Ka kur Syiem Mylliem (Kpoh Mawlai), ka la pynpaw ïa ka jingsngew lyngngoh ïa rukom pyntyllun kam jong ka Khasi Hills Autonomous District Council (KHADC) lyngba u Executive Member in-charge Elaka ha kaba ïadei bad ka jingwanrah Syiem thymmai ha ka Hima Mylliem.
Ki arngut ki rangbah na ka Kur Syiem (Kpoh Mawlai) ba kynthup ïa u Bah S. Syiem bad u Bah W. Syiem ha u kyrwoh ki la ong, “’ka Iingbishar Meghalaya High Court badonburom, katkum ka hukum ba la pynmih ha ka 14/10/2022, ka la pynpaw ba ka sngewïahap ïa kata ka jingmudui ki Myntri ka Hima Mylliem ba ki pyrshah ïa ka jingshong khet u Ainam Manik Syiem kum Acting Syiem ka Hima Mylliem, katba ka jingtohkit pyrshah ïa u Syiem ba la shah weng shipor u Latho Manik Syiem ka dang ïaid bad ba ka Iingbishar badon burom ka la bthah ruh ba dei ban weng noh shwa ïa ka jingshong khet u Ainam M Syiem namarba u dei u pyrsa trai jong u Latho Manik Syiem, khnang ba kane ka jing tohkit kan long kaba ïaid beit ïaid ryntih bad kaba khuid ba suba khlem da ïa shah liang.”
“Kaba sngew thamula ka long ba ka KHADC da ka jingkren u EM Incharge Elaka u Bah Jambor War ha ki khubor kiba la mih ha kine ki sngi ba la dep (6 tarik Nophrah, 2022) u khlem kren eiei shaphang kata kaba hap ban weng noh shwa ïa u Ainam M Syiem na ka khet Acting Syiem khnang ba kan ïaid beit ka jingtohkit, hynrei u la kren pynban ba la dei ban khot noh da ka elekshon. Ngim lah shuh ban sngewthuh ba balei u EM Incharge Elaka u shem jingeh haduh katne katne ban bud beit bud ryntih ïa ki jingbthah ba la wan na ka Iingbishar badon-burom. Ngi kynmaw ba ïa u Pa’iem Latho Manik Syiem la weng noh shipor ïa u naduh ka 21 tarik, Ïaiong, 2016, na ka jinglong Syiem bapura ka Hima Mylliem, tang hadien ba la ïoh ïa ki jingujor na ki Myntri ba don hapoh ka Hima Mylliem, hynrei mynta pat haba ka hukum ka la wan kat na ka Meghalaya High Court ruh kaba long ka Iingbishar ba ha khlieh duh hapoh ka jylla jong ngi hynrei kim leh satia ïa kata,” ki la ong bad bynrap, “hato don aiu mo sha lyndet ba ki kwah ban pynneh beit ïa u Ainam M Syiem kum u Acting Syiem ka Hima Mylliem.”
“Sa kawei ruh ka long ba ïa mynta ngim pat sngewdei hi ruh wat tang ban ïa kren ïa ka Election hapoh ka Hima Mylliem katba kam pat ïa shai shwa ïa ka Enquiry Report bad ha kano ka nongrim hi ba ka KHADC ka pdiang ïa ka shithi resaiñ jong u, namarba u dei ma u uba hap ban jubab hakhmat ka jingtohkit halor ki jingkynnoh pyrshah ïa u bad lada shem ba u dei uba khuid lah dei ban thung biang ïa u bad lada shem ba u dei u ba donkti shisha dei ban weng noh shi syndon ïa u na ka khet Syiem bapura. Hynrei ban shu ong ba u lah resaiñ bad ba ka Case pyrshah ïa u ka lah kut, kata kalong kaei kaei kaba sngewthamula, namar ki jingkynnoh kam dei tang ïa u Syiem. Hynrei ïa u Syiem Khynnah bad ïa ka Executive Durbar ki long kiba shongnia shisha,” ki la kynthoh.
“Hato kat kito ki hukum kiba ka High Court badonburom ka la pynmih ha ka 13 tarik, Nohprah, 2019 bad ka 14tarik, Risaw,, 2022 ki dei ki bym treikam mo hakhmat ka KHADC. Namarkata, ngi ki Kur Syiem Mylliem (Kpoh Mawlai) ngi sngew ban ong ba to ai ba kan long ka jingsneng ïa ki Syiem bad ki Myntri kiba pyndonkam bakla ïa ka iktiar ka jong ki bad lashai hadien habud lada kiew khet kiwei ruh ba kin peit beit thik tang ïa ki kam ban kyntiew ïa ki khun ki hajar ha ka synshar khadar hapoh ka it ka hima jong ka Hima, namar ka Aiñ ka don lada ki ïaid palat na kata,” ong kine ki arngut ki Rangbah na ka Kur Syiem.
“Ka Kur Syiem Mylliem (Kpoh Mawlai) hi ka ngeit skhem bad ka don jingkyrmen ba ka KHADC hapoh ka jingïalam jong u Bah Jambor War kan pynbeit ïa kine ki kynrum kynram baroh bad ban wanrah ka jingkhuid jingsuba ïa ka synshar khadar hapoh ka Iingdorbar jong ka Hima Mylliem bad khamtam ba ka dei ban bud beit ïa ka jingbthah jong ka Meghalaya High Court ba don burom,” ong shuh shuh kine ki arngut.
