Balei hap ban don Syrnod ST ban ïoh ïakhun elekshon MDC ha GHADC buh jingkylli u MLA

Shillong, Lber 1 : U MDC barim bad MLA ka Phulbari SG Esmatur Mominin ula buh jingkylli balei ba ki kyrtong kin hap ban don ïa ka syrnod Scheduled Tribe (ST) haba thep kyrteng ban ïakhun ïa ka elekshon jong ka MDC sha ka GHADC
U Mominin ula ong ba ka Sixth Schedule jong ka Riti Synshar ka Ri kala kren shai ïa ka jingpynlong ïa ki Autonomous District Council. Kat kum ka jingong jong u, ka District Council ka don 30 ngut ki dkhot-29 ngut ba jied da u paidbah ba la kynjoh 18 snem (adult suffrage) bad uwei bat hung da u Lat ka Jylla.
U ong ba ka adult franchise ka mut ïa kino kino ki nongthep votee bala kynjoh palat 18 snem, kiba lah ban ïakhun ïa ka elekshon bad thep vote. “Kam don kyndon satia ha ka Sixth Schedule ba buh kyrpang ïa ki constituency lane ba dei ban don beit ïa ka syrnod ST ban ïakhun elekshon” ula ong.
U Mominin ula bynrap ba kino kino ki jingpynkylla ki dei kiba lah ban leh tang da ka jingpynkylla ïa ka Riti Synshar ka ri da ka Sorkar Pdeng ym da ka District Council. Ula kam ruh ba ka GHADC ka khlem shim ïa ka jingbit u Lat ban wanrah ïa kane ka kyndon.
Haba pynpaw ba ym pat kwah ban rah sha ki ïing Bishar ïa mynta, u Mominin ula ong ba lada don ki kyrtong kiba shah khang ban ïakhun ïa ka elekshon halor kane ka nongrim, ïa kane ka kam lah ban phah sha ki bor ba dei khmih lane tynjuh ïa ka ha khmat ka ïing Bishar.
Kane ka jingpynmih hukum ka GHADC kala mih ha u bnai Rymphang hashuwa ka elekshon sha ka ïing Dorbar Thaw Aiñ jong ka Council.