Balei bun ki longkmie bym don kurim ha Meghalaya : Kwah ka NCW ban wad bniah

Shillong, Naitung 08 : Ka National Commission for Women (NCW) ha ka sngi Nyngkong ka la ong ba kan pynlong ïa ka jingwad bniah bad ngam jylliew shuh shuh halor ka jingnang bun ki longkmie ha ka jylla Meghalaya ki bym don shuh u kurim lane u nongkamai watla kadei ka Jaidbynriew kaba ai jait sha ka Kmie.
Haba kren bad ki lad pathai khubor ha ka jingwan jong ka sha Shillong, ka Chairperson jong ka National Commission for Women (NCW), ka Rekha Sharma ka la ong, “Lada dei dei shisha ba ki longkmie ha Meghalaya ki shah ieh lok da kaba shah pynbor, ngan kmen palat ban wad bniah halor kane. Ngan sa ong ïa ka Kong Delina Khongdup (dkhot ka NCW) ban wad bniah bad peit kaei kaba ngi lah ban ïarap.”
Ha kajuh ka por pat ka ong lada dei ba ki longkmie ka jylla da ka mon sngewbha ki jied ban im khlem u lok, ïa kata kum ka Commission kim lah satia ban tuklar. “Hynrei lada dei ba ka shu jia ryngkhat lane da kaba shah thohbor kane kadei da kawei pat ka bynta, kaba ngi hap ban tuklar bad ïarap hynrei lada dei kaba ki jied hi te ngim lah leh ei ei.”
Katkum ka kaiphod halor ka ‘Exploratory Study on the Socio-Economic Status and Problems of Single Mothers in Meghalaya’ ba la leh da ka State Commission for Women ha u 2022, la lap ba ki don haduh 3,078 ngut ki longkmie ba khlem lok ha ki 7 tylli ki District napdeng ki 12 tylli kiba la dep wad bniah ne sorbe. Ym tang katta la kdew ruh ba haduh 46.2 persen kidei ki bym nang bym stad katba 28.4 persen pat kidei kiba dang pyndep tang ïa ka primary school.
Da kaba pynshai bniah halor ki aiñ thymmai ba ïadei bad ki kam bymman, ka Chairperson ka la ong ba kane kan ïarap ïa ki kynthei lada jia ba u shynrang u kular ban ïathoh shongkurim bad hadien pat u shongkha ïa ka hynrei khatduh pat um treh ban shongkurim, une u briew u lah ban shah pynngat ha ki kyndon jong ka aiñ.
Nalorkata, ka ong, “ Wat ha ka IT Act, lada ki briew ki kren tohmet ïa ki kynthei online, ki lah ban shah pynngat kam bymman ha ki Pulit. Kumta, ki don shibun ki kyndon jong kane ka ain thymmai ki ban ïarap bha ïa ki kynthei.”
Nalorkata, haba kren pat halor ki kam thombor ïa ki kynthei ha ka jylla, ka Chairperson ka la ong ba ka thain shatei lammihngi (North East) ka kham long shngain ïa ki khynthei lada ïa nujor bad kiwei ki jylla jong ka ri India.
Shuh shuh ka la ïathuh ba na ka liang ki dkhot ka NCW ki shimkhia ïa iwei pa iwei i jingjia shah thombor ïa ki longkmie bad ki kynthei ym dei eh tang ha Meghalaya hynrei wat ha kiwei ki jylla jong ka thaiñ shatei lam-mihngi jong ka Ri.
La ïathuh ruh ba dang shen ka la tuklar hi dalade halor ka jingjia shah thombor kawei ka longkmie ha rilum Garo.
Ym tang katta, ka ïathuh ruh ba ka Commission na ka por sha ka por da kaba treilang bad ka NALSA ka ju pynlong ruh ïa ki prokram ai jinghikai ha kylleng ki bynta jong ka ri ha kine ki lai snem ba la dep kumno ban tip shaphang ki kyndon aiñ.