Shillong, Naitung 08 : Da ka thong ban kyntiew ïa ka jingïalehkai siat suloi ha ka thain shatei lam-mihngi jong ka Ri, ka jylla hynne ka sngi ka la ïa soi ïa ka soskular Memorandum of Understanding (MoU) lai dong, kata hapdeng ka National Rifle Association of India (NRAI) lyngba u bad u K Sultan Singh, Secretary General, Shooting Association of Meghalaya lyngba u President Bah John F Kharshiing bad ruh bad ka tnad Ïalehkai jong ka sorkar jylla
Ïa kane ka soskular la iasoi ha ryngkat ka jingdonlang u Myntri Rangbah ka Jylla Conrad K Sangma nangta u President ka NRAI u Kalikesh Narayan Singh Deo, ha kaba ki la pynpaw ïa ka jingthrang ban kyntiew ïa kane ka jingïalehkai ha baroh kawei ka jylla.
Kane ka soskular (tripartite agreement) ka don ïa ka thong na ka bynta ban don noh ia ki jaka hikai siat kiba paka tam kum kiwei ki ri ka prythei ha Meghalaya, nangta ban don ia ki coach bad ki jaka kilan met bad khamtam eh ban wad ïa ki khynnah bad ki riew donsap naduh ka rta kaba ki dang rit haduh kiba la san.
Kane ka long ruh shi bynta jongka thong ban pynlong ia ka Meghalaya kum kawei na ki jylla kiba ban sei ia ki nongïalehkai kiba paw ym tang ha ka ri hynrei wat ha ki lympung ialehkai jongka pyrthei.
Haba kren ha ka jingïalang, u Myntri Rangbah ka Jylla Conrad K Sangma u la ong, “Kane ka jingïatreilang ka buh ia u mawnam ban kyntiew ïa ki kam ialehkai ha ka jylla Meghalaya. Ngi sngewsarong ba ngi lah ban ïatrei lang bad ka NRAI ha kaban buh ia ki jaka ban pynkup bor ia ki samla jongngi ha ki kam ïalehkai siat suloi.
Katba na ka liang u President ka NRAI, u Kalikesh Naryan Singh Deo u la ai ka jingïaroh ïa kane ka sienjam ba shim da ka sorkar Meghalaya bad ong, “Ka thaiñ Shatei Lammihngi ka ju don ïa ka sap ïalehkai kaba khraw. Kane ka jingïatreilang kan buh ïa ka nongrim ïa ka Meghalaya ba kan long ka shlem jaka siat suloi ha ki snem ban wan.”
U President, ka NRAI, u la pynpaw ruh ba katkum ka soskular, ka NRAI kan pynlong ïa kawei ka Open India Championship man la u snem ka ban long ka jingkyntiew kaba khraw ia ka ïoh ka kot jong ka jylla Meghalaya namar palat 4000 ngut ki nongïalehkai kin wan na ka bynta ka shibnai jong ka Championship ha ka jinglut jong ki hi”.
Ka MoU ka kdew ruh ba kan sa donlang ruh ïa ka jingkitkhlieh na ka bynta ban don ïa ki jaka ïalehkai, ki jaka kilan met, ki tiar ïalehkai, bad ruh wat ban pynlong ia ki lympung ïalehkai ha ka jylla.
Ha kane ka prokram la wan ban donlang naduh u Dr. Vijay Kumar D IAS, Commissioner, Sports, Bah PB War Nongbri, Asst Director, DSYA, ki heh sorkar ka jylla Meghalaya, Neil Sootinck, General Secretary, Shooting Association Meghalaya bad kiwei kiwei.
