Shillong, Nohprah 14 : U Myntri ka tnad ka Koit ka Khiah ka sorkar jylla, James K Sangma ha ka sngi Balang u la ïathuh ba ka sorkar ka la dep ban ïa soi soskular bad ka Apollo Telehealth Networking Foundation na ka bynta ban sdang noh ïa ka projek ba la tip kum ka 1st Cancer Care Project ha Meghalaya.
Haba ïathuh ïa kane, u Myntri u la ong ba ka sienjam ba ka sorkar ka shim kadei hadien ba ki la ïohi shibun ki dak ki shin kiba ïadei bad ka jingpang bampong bapher bapher kiba don ha ka jylla. “Ngi thrang ban shimkhia ym tang ban ai jingsumar hynrei ban lap kloi naduh dang sdang jong kano kano ka jingpang,” u la ong haba kren bad ki lad pathai khubor.
Da kaba pyntip ba lyngba katei ka projek kin lah ban teh lakam bad lap kloi ïa ka jingpang, u Myntri u la ïathuh ba mynta ba ïa kane ka projek kin sdang shwa na East Khasi Hills. Na ka liang jong u, u la pynpaw ruh ïa ka jingkmen ba na ka liang u IT Secretary jong ka sorkar India u J. Satyanarayana uba la ïarap bad ai jingmut shibun haba ïadei bad kane.
Ha kajuh ka por, u Myntri u la pyntip ruh ba ïa ka Cancer Wing kaba don ha ka Civil Hospital, shen yn sa plie noh bad katei ka jaka treikam ruh shen kan sdang noh ban ai ïa ka jingshakri.
“Kane kadei kaba la slem bha hynrei ngi kyrmen ba da ka jingplie ïa ka, kan lah ban ai ka jingsumar kaba paka ïa ki nongpang.”
