Ba ym don ka jingïatrei lang ki Engineer sa twa u Dome ka Assembly ong ka kaiphod IITG

Shillong, Nailur 9 : Ka sorkar kan sa pan jubab na baroh ki engineer, ki kontraktor, ki designer, Project Management Consultant (PMC) halor ka jingtwa u Dome ha Assembly ba thymmai ha Mawdiangdiang namar kat kum ka kaiphod jongka Indian Institute of Technology Guwahati (IITG) ka daw jongka jingtwa bad jingkhyllem ka dei namar ba ym don ka jingïatreilang hapdeng jongki.
U Myntri Rangbah ka jylla u Conrad K Sangma haba kren sha ki lad pathai khubor u la ong ba ka IITG ka la aiti ïa ka kaiphod jingtohkit jongka bad ïa kane ka kaiphod la wanrah hakhmat ka High Powered Committee (HPC) ba la khlieh da u Lamphang ka ïing Dorbar Thawaiñ u bah Metbah Lyngdoh.
U la ïathuh ha ka jingtohkit ka IITG ka la lap bad pynpaw ba ka daw bah ba la jia katei ka jingtwa bad khyllem u Dome ka dei ka jingkhia palat pud bad kam don kano kano ka jingïatrei lang hapdeng kiba donkti ban tei ïa katei ka ïing Dorbar naduh ki Engineer, ki Designer, ki kontraktor bad ka Project Management Concultant (PMC) namar ban da dei ba ïatrei lang da baroh kane ka jingjia kan ym jia hi ruh.
U Myntri Rangbah ula ïathuh lait noh na katei ka bynta ba twa bad khyllem u Dome ka IITG ka la lap bad kiwei kiwei ki bynta jongka ïing dorbar ki biang lut bad ka jingtei ka skhem bha bad kam don jingktah satia.
U la ïathuh ruh ba ka HPC ka la bthah ïa ka sorkar jylla ba ka dei ban khot hajir mar mar ïa kine kiba ïadon bynta ban tei ïa ka ïing dorbar ban pan jingpynshai na ki na kaei ka daw ba kam don ka jingïatrei lang ha ka jingtei ia u Dome.
“ Kumta ka sorkar kan sa khot noh ïaki ban ïoh pan jingpynshai bad jubab kaba biang. Ka sorkar kan sa ai jingmut ruh da kaei ka lynti pat ban leh bad ïa kane ka jingpynkhreh ban tei thymmai bad yn sa wanrah biang hakhmat ka HPC hapoh 10 sngi” ong u Myntri Ranmgbah.
Haba la kylli hato ka HPC kan tei biang ïa u Dome, u Myntri Rangbah u la ong ka kaiphod ka la kren shai ba lada ka HPC ka rai ban tei biang ïa u Dome ka dei ban tei da uba sting bha.
“ Ka kaiphod ka la kren shai ba lada tei biang ïa u Dome dei ban tei da uba sting bad tap ruh da ka tin CGI. Kane ka pynpaw ba lah ban tei biang ïa u dome tangba uba sting ym shuh uba khia 4.50 lak Kilo kum uba rim tangba ia kane ruh yn sa shim rai da ka HPC hi” ong u Myntri Rangbah.
Hato ka sorkar kan pynsaja ïa kitei kiba ïadon bynta ban tei ïaka Assembly ba thymmai bad ki bym shym la ïatrei lang tad haduh ba ka wanrah ka jingtwa bad khyllem u Dome, u Myntri Rangbah u la ong “ Ngin pan jubab shwa na ki balei kane ka jia kumne bad hadien ba la ïoh sngew lang na baroh ki liang ka sorkar kan sa shim ïa ka rai bad khamtam ban pynshongdor ruh ïa ka jingjulor na ka jingtwa u Dome.