Shillong, Nailur 06 : Kum ka jingpynkhreh na ka bynta ka Synod kaban long ha u Lber jong ka snem ban wan ha ka shnong Umlyngka, na ka liang ka Dorbar Shnong Umlyngka ryngkat ka tnad PWD ki la plie paidbah ïa u mawnongrim ban shna bad siang surok rong thymmai naduh Mawsyiem Umlyngka ter ter sha Mawdumdum haduh Nongkseh Syllei kaba jrong kumba 1.595 kilometer.
ïa une u mawnongrim la wan ban plie da u Chief Adviser jong u Myntri Rangbah Bah Hamlet Dohling ryngkat ka jingdonlang u Chief Engineer ka PWD Bah D Langstang, u Superintendent Engineer, ki Executive Engineer, ki Rangbah Shnong jong ka Umlyngka bad kumjuh ki Pastor jong ka Balang Presbyterian Umlyngka nalor ki paidbah nongshong shnong.
Haba kren ha kane ka sngi u Kongsan u la ong ba ha u snem 2022 mar ïa tip ban wan ka Synod ha u snem 2025 mardor ki la ïa kynduh ryngkat bad ka Balang Umlyngka ban ïa tai sani na bynta ka jingpynkhreh.
U ong ruh ba wat hapdeng ki jingeh kiba bun hynrei u la lah ban pynkohnguh ïa u Myntri Rangbah kumjuh ïa u Symbud Myntri Rangbah ka Jylla Bah Prestone Tynsong haduh ban da ïoh ïa ka mang tyngka.
Shuh shuh u la kyntu ïa ki kontraktor ba kin pyndep ïa ka kam ha ka por kaba biang namar kim kwah ban ïohi ba ynda la sdang ka Synod, ka surok pat dang pum pum.
U Bah Hamlet u la ïathuh ruh ba la mang 5.40 klur tyngka na bynta katei ka projek.
Na ka liang u Chief Engineer u la banjur lang ba ïa kane ka surok dei ban pyndep ha shwa u bnai Lber 2025. U la ïathuh ba ïa ka kam la bynshet ha ki 60 -70 tam ki kontraktor ban pynstet ïa ka kam.
La pyntip ruh ba yn sa pynbha lut ruh ïa ki surok shnong kiba don baroh 5 kilometer ban pynkhreh na bynta katei ka jingïaseng heh.
Na ka liang u Pastor C Kharbuki u la ong ba ka Balang Presbyterian ki la pynpaw ka jingsngewnguh ïa ka Dorbar Shnong kaba trei ryngkat ryngkat khamtam ia u Bah Hamlet uba la trei borbah naduh ka por ba u dang long MLA ban pynïoh ïa katei ka surok.
Ha kajuh ka por ki Rangbah Shnong ka Umlyngka baroh ki la pynpaw ka jingsngewnguh kaba khraw ïa ka jingkloi jong u Bah Hamlet kum u MLA ha kito ki por bad haduh mynta kum u Chief Adviser uba la pynïoh ïa katei ka surok.
