Shillong, Jylliew, 15: Ki nongïalam ka Balang Presbyterian Nongmensong ryngkat ka Dorbar Shnong hapoh ka jingïalam jong u MLA ka thaiñ, Bah AL Hek ha ka sngi Ba-ar ki la kynduh ïa u Symbud Myntri Rangbah ban kyntu ïa ka sorkar jylla ban phah maramot noh ïa ki surok kiba don ha ka thaiñ namar ka jingwan ka Presbytery ha ka 18tarik u Rymphang 2023.
Na ka liang u Bah AL Hek haba kren bad ki lad pathai khubor, u la ïathuh ba nalor ka surok, kum ka kynhun ki la kyrpad ruh ïa ka sorkar ba kan pynbiang wat ïa ka bording na bynta ka jingwan jong ka Presbytery.
“Ngi la kyrpad ruh ban kylliang noh ïa u transformer ba la rim bha uba don hajan ka khyrdop ban rung sha ka Iing Mane Presbyterian bad kiwei kiwei,” bynrap biang u Bah Hek.
La ïathuh ruh ba na ka liang u Symbud Myntri Rangbah u la kular ban shimkhia bad peit ïa kitei ki jingkyrpad ba ka kynhun ka buh na ka bynta ka jingïaid beit katei ka jinglehniam kaban long ha u Rymphang jong u 2023.
