Shillong, Naiwieng 16 : Ka Khasi Hills Autonomous District Council (KHADC) ka la maham lypa ba kam banse shim da kiwei pat ki sienjam lada ka jingwan tur bad ka jingthmu ban pynjulor ïa ki jingdon jingem jong ka Council kan dang ïai jia biang nangne shakhmat kumba la jia ha ki khyndiat por ba la dep.
Haba kren bad ki lad pathai khubor, u Deputy Chief Executive Member ka KHADC, Bah Pynshngaiñ N Syiem u la ïathuh ruh ba dang shen la don ka kynhun kaba la jynrat ïa ka khyrdop jong ka Council ban ïoh rung shapoh ban pynlong jingïakhih.
“Na ka liang ka Council kan hap ban shong pyrkhat da ka sienjam kaba thymmai lada kum kine ki jingjia ki dang ïai bteng namar ka pynthut bad ka ktah ruh ïa ka jingtreikam jong ka Council,” ong u Deputy CEM.
Shuh shuh u la ïathuh ruh ba dang ha ki khyndiat sngi ba la dep don ki kynhun kiba la wan ban pynkhih win bad na ka liang ka Council ka la thmu ban ujor da ka ejahar sha ki pulit hynrei namar ba kam pat don kano kano ka jingjulor kumta ki la sangeh noh shwa.
“Ngi la ïakren hapdeng jong ngi ban ujor noh da ka ejahar halor ka jingpynkhih ïa khyrdop, hynrei namar ba kam shym don ka jingjulor ngi la sangeh noh,” u la ong da kaba bynrap ba lada dei ba ka la don ka jingjulor lehse kim banse ban ujor beit sha ki pulit.
Shuh shuh u ong ruh ba lada kum kine ki dak ki dang ïai bteng ban paw kum ka Executive Committee kam banse wat ban pyrkhing noh ïa ka rung ka mih jong ki briew sha phyllaw jong ka KHADC khnang ba kan ym long laitlan ban rung katba mon.
U ong ruh ba kane ka sienjam ka long na bynta ka jingshngaiñ jong ki nongtrei bad kumjuh ruh ba kan ym don kano kano ka jingpynjulor ïa ki jingdon jingem jong ka Council.
