Nongstoiñ, Nailar, 19: Ka surok na Langdongdai kaba jrong kumba san kilomitar ka dei kaba la mang pisa da ka sorkar pdeng lyngba ka skhim Pradhan Mantri Gramsadak Yojana (PMGSY), kaba ka sorkar ka la ai bad pyntrei ha u B.K.Agarwal u kontraktor uba na Assam. Katei ka surok la dep ban siang rong naduh u snem 2022 bad ka dang don tang lai snem, hynrei na ka jingtrei torti palat jong utei u kontraktor ka surok ka la jot rathai bad ki don ki bynta ba ki kynroh ki la twa.
Ha ka jingleit jurip jong u nongthoh khubor dang shen, la lap ba ka jingpyntrei ïa katei ka surok ka long da kaba shu siang mawria malu mala bad theh khyndew ha jrong bad shu ñiat da ka rong ïong na jrong. Nalor kata la lap ruh ba ïa ki sañium baroh arliang jong ka surok ym shym la pynkhuid ka nala ruh ym don.
U bah Gardening Rongrin uwei na ki riew rangbah ka thaiñ ryngkat bad ki sordar jong ka shnong Mawsmai, Langdongdai, Porshken, Mawguru, Porïu bad kiwei kiwei ki shnong jong katei ka thaiñ Nongtrai sepngi, ki la ong ba utei u B.K.Agarwal u dei u kontraktor u ba ka sorkar jylla ka ju ai ïa ki jingtrei kiba heh ba heh man la ka por, wat la ki jingtrei ki long kiba torti haduh katta katta bad ha ka thaiñ Nongtrai u la ïoh ban pyntrei surok haduh lai sien.
Ka sien ba nyngkong ka dei ka jingpynbha bad siang rong ïa ka surok na Athiabari haduh Riangdo ha u snem 2008-09, hynrei tang hadien shi snem katei ka surok ka la jot la pra bad ha u snem 2014-15 ka sorkar ka la mang pisa ban shna noh da ka intermediate lane bad utei u juh u kontraktor, u la ïoh ban pyntrei biang ïa katei ka surok. Nalorkata ïa katei ka surok na Langdongdai kaba ïasoh bad ka surok PWD kaba poi haduh Malangkona ruh utei u juh u kontraktor u ba pyntrei.
Kitei ki rangbah ki la ong ruh ba imat ki heh jong ka sorkar ki la ïoh mluh na utei u kontraktor, lymda kumta kumno u shu ïoh jingtrei man la ka por haba kiwei ki kontraktor kiba kwah jingtrei ki don eda ki hajar ngut. Ha kajuh ka por ki la ong ba katkum ki kyndon ba ka sorkar ka la thoh ha ki sign board kiba la pynïeng ha ka jaka ba katei ka surok PMGSY ka ïatyngkhuh bad ka surok PWD, la kdew hapoh san snem naduh ba la pyndep ka surok ka dang hap hapoh ka jingpeit bad khmih jong u kontraktor bad ka por ba utei u kontraktor u dang hap ban peit ka dei haduh u snem 2027.
La kdew shai ruh ha ka sign board ba ka la mang ruh shiphew lak tyngka na ka bynta shi snem ban phah pynkhuid ïa baroh arliang ka surok, ban maramot ïa ki bynta ba jot bad pynbiang ïa ki nala um khnang ba ka surok kan neh, hynrei utei u kontraktor um shym la leh satia kumba la btah da ka sorkar.
Kitei ki rangbah shnong ki la ong ruh ba dei halor katei ka nongrim ba ka surok ka jot ka pra bad ki la dawa na ka sorkar ba ka dei ban hukum ïa u Agarwal, ba u dei ban maramot bad pynbiang noh ïa ki na la um paha prat bad pynkhuid noh ïa baroh arliang surok, namar katei ka surok ka dei u budlum jong ka ïoh ka kot, ka khaïi ka pateng jong baroh ki nongshong shnong ka thaiñ Nongtrai sepngi.
Haba kdew halor ki jingeh na ka jing sniew palat liam jong katei ka surok, ki la ong ba la bun sien bun wat ki jingïatyngkhuh kali ki jia ha katei ka surok namar la tap da ki sañium baroh arliang surok.
Nalor kata ïew Dhupdhara ha Assam ka dei ka ïew ba kongsan jong ki paitbah Nongtrai kaba ki hap ban ïaid lyngba katei ka surok, hynrei na ka jingtrei torti jong u kontraktor ka la buh ïa ki paitbah ha ka jingeh kaba khraw.
Kitei ki rangbah ki la ther tyngeh ïa u bah R.G.Momin MLA ka thaiñ, ha kaba ki la ong ba ki la ïoh jingtip ba ha kiwei ki jaka jong ka constituency, u ju kren kop da kaba ong ba ki surok ha ka thaiñ jong u ki la biang lut. Hynrei na ïing jong u haduh ka bynta ba katei ka surok PMGSY ka sdang ka jngai tang kumba saw haduh san kilomitar pynban um ïohi.
Nalor kata ki la ong ruh ba ha ka por ba um pat shah jied kum u MLA u dang long kum u Sub Inspector of School jong ka West Khasi Hills, haba u wan sha shnong da ka scooty u ïaid lyngba katei ka sur bad u ju ong ruh ha ki paitbah, ba lada u shah jied kum u MLA katei ka surok ka dei ka mat ba kongsan tam kaba u la buh thong hynrei ynda u la jop pat de um ju wan ïaid shuh na katei ka surok.
Ki la ther tyngeh ruh da kaba ong ba man la ka taïew ka kali pynpah siren jong u naduh Malangkona, Hahim, Riangdo haduh Nongstoiñ ka sawa katba na Malangkona haduh langdongdai, Mawkyllon, Mawdiang haduh Riangkang, ym ju ïoh sngew siren satia. Kumta ki la dawa jur ba u MLA u dei ban wan pynpah siren ha katei ka thaiñ ruh kumba u la kular ha shuwa ban poi ka por Election.
