Shillong, Nailur 12: Ka seng HANM, Riwar Mihngi Circle ha ka sngi u Saitjaiñ ki la hiar ban leit jurip ïa ka surok Lyngkhat sha Tmar hadien ba ki paidbah nongleit nongwan bad ki paidbah nongshong shnong jong ka Nohwet, Nongsohphan, Lyngkhat bad kiwei kiwei ki shnong ba don ha ka tei ka thaiñ ki la ujor sha ka seng ba ka don ka jingtrei torti bad ka jingbym pynbha da u contractor katkum ki kyndon ka skhim PMGSY.
Ha ka jingjurip ka seng ka la lap ba wat ka jingkieng ruh la shu siang da ki dieng kaba lah ban buh jingma ïa ki nongleit nongwan.
Haba kren sha ki lad pathai khubor u President ka seng u Bah Shaiborlang Nongrum u la ong ba ha ka jingshisha ka sorkar pdeng ka la buh ki kyndon ba ïa kane ka surok dei ban pynbha bad maramot haduh u snem 2025-26 namar kane ka surok ka dei kaba la pyntrei lyngba ka skhim PMGSY.
“Ha ka jingjurip ngi lap ba kiba bun ki bynta kim don rong shuh bad kane ka jia namar ka contractor kam pyntreihok satia kat kum ki kyndon ka skhim” u la ong.
U la ong ruh ba ka jingkieng kaba don ha kane ka surok la siang pynban tang da ki dieng tylli kiba shu pom na sha khlaw kaba buh jingma pat ba ka lah ban hap ha kano kano ka por kabn wanrah jingjia kaba sngewsih.
“U Symbud Myntri Rangbah ka jylla u shait ong ruh ba ka sorkar kan pynshitom wat ban black list syndon ïa ki contractor kiba kiba trei tang dep rukom ngi kwah ban ong ba ka sorkan kan pyni da ka kam ïa ka contractor kaba pyntri ïa kane ka surok” u la bynrap.
U Bah Shaiborlang u la pynrem jur ruh ïa ka tnad PWD namar ka jingbym suitñiew ban leit jurip ïa kane ka surok ban pynthikna ba ka jingpyntrei kan long kaba paka , “ha ka jingshisha ki dei ban jurip bad ban ai ka jingkynthoh sha ki bor ba halor kat kum ka jinglap jong ki.
