Nongpoh, Risaw 05: Ki san tylli ki longing ha ka shnong Nongspung B ki la hap ban kylla langkñia kaba dei tang na ka daw ka jingtih khyndew na uwei u lum hajan katei ka shnong, ba ka khyndew bad ki shyiap ki tuid sha ka shnong bad rung sha ki iing ki sem bad pynjot wat ki jingthung ki jingtep.
Kane ka jingtih khyndew ka dei kaba la pynïaid da uwe u briew ba la tip kyrteng kum u Donald Srinate, uba dei na ka jaid bynriew Naga, ha kaba u la tih ïa uwei u lum naduh u snem ba la dep bad ha kane ka por lyiur ka khyndew bad ki shyiap ki la tuid sha katei ka shnong haduh ba la pynjulor ïa ki iing ki sem bad ki jingthung ki jingtep.
Kitei ki san tylli ki longing kiba la shah ktah jur, ka dei ka longing jong ka Kong Premika Sungoh, Lijanta Sungoh, Kerning Sungoh, Manar Suting bad ka iing jong ka Kong Wompher Dhar.
Kumba la ïathuh, da kitei ki longiing bad ki nongïalam shnong, la ong ruh ba wat ka jingtih khyndew ruh ym lah ban tip la ki la ïoh bor ne em na ka shnong bad shuwa ban tih khyndew ruh ym don kano kano ka jingpyntip sha ka shnong ha kaba la suba ba la leh da u rangbah shnong barim.
U Rangbah shnong u Bah Phelimon Tongper bad u Bah Riton Sumer, ki la ong ba ha ka jingshisha ïa kane kam la ujor sha Pilingkata Police Outpost bad kumba long haduh mynta kam don kano kano ka jingshim khia halor kane ka jingshah ktah kitei ki longing.
La ong ruh ba ki longiing ba la shah ktah ki la kren bad utei u trai katei ka jaka ba tih ïa ka khyndew, ha kaba u la shu kular tang ban pynkhuid ïa ki shyiap bad ki khyndew ba tuid sha katei ka shnong bad halor ka jingjulor ba ki la shah ktah um shym la siew satia haduh mynta ruh.
Kine ki longing kiba la shah ktah, la don ruh kiba la hap ban kynriah noh namar ym long shuh ban shong ban sah ha kitei ki iing ba ka khyndew bad u shyiap u la rung shapoh iing bad wat la katta ruh kaba sngewlyngngoh ka long ba u trai katei ka jaka tih khyndew um lah satia ban siew ïa ka bailutksan, ki la ong.
Na ka liang ka shnong ki la bynrap ruh ba ki hap ban wad ïa ki lad ki lynti ban leh da kaba tyngeh ïa katei ka kam tih khyndew beaiñ bad ki la kyrpad ruh ïa ki bor sorkar khamtam ka tnad Forest ba ka dei ban shim khia halor kane ka jingshah ktah ki nongshong shnong namar katei ka jingtih khyndew tang shu wan u lapbah ka la pynjot lut ïa ki ing ki sem bad ruh ki jingthung jingtep ba baroh ki khyndew bad ki shyiap ki tuid sha katei ka shnong Nongspung B, la pynpaw kitei ki nongïalam Shnong.
