Mawkyrwat, Naitung, 02: Ka Federation of Khasi Jaiñtia & Garo People’s (FKJGP) South West Khasi Hills District ha ka jingïalam jong u Working President, u Kenes L. Nonglait ha ryngkat u General Secretary jong ka Mawkyrwat Circle ki la pynlong ïa ka jingleit jurip ïa ka ophis trei kam jong u Executive Engineer jong ka PWD (Roads) Mawkyrwat Division ha kaba ïa dei bad ka kamra treikam jong u Head Assistant lane u Bara Babu kaba la thylli naduh u snem 2019 haduh mynta.
Hadien ka jingleit ban ïakynduh ïa u EE ka PWD (Roads), u Working President ka FKJGP, u bah Kenes L. Nonglait haba kren ha ki lad pathai khubor u la ong ba kane ka jingleit jurip jong ka seng ka long hadien ba ka la don ka jingud jingman na kiba bun ki paidbah kiba leit donkam ha kane ka ophis u PWD (Roads) Mawkyrwat Division ne wat ka jingud jong ki para nongtrei ruh namar tang na ka daw jong ka jingbym don u/ka Head Assistant ne Bara-babu bun ki kam ki la long kiba dkoh lut.
“Naduh 2019 haduh mynta u/ka Head Assistant um pat don, kane ka la long shisha ka jingduhnong kaba khraw na ka bynta ki nongleit donkam ha kane ka ophis”, ong u bah Kenes L. Nonglait.
Kumta dei tad hadien ka jingïakren ba sani bad u Executive Engineer jong ka PWD (Roads) Mawkyrwat Division, bah D.M. Pyngrope ki la lap ba ïa kane ka shuki kaba thylli baroh shi katta ki dang shu dep thung shen bad mynta ka dang don ha ka jingpynkhreh bad pynbit pynbiang ïa ka kamra jong u/ka Head Assistant.
Kumta, na ka liang jong ka seng ka la la ong ba katne kam pat long kaba biang hynrei kan sa nangpeit parman bha bad kan sa bud dieng biang ïa kane ka kam khnang kan ym buh jingeh shuh ïa ki nongtrei jong kane ka ophis bad kumjuh ïa u paidbah uba leit donkam ïa u bara babu namar kumba long baroh shi katta ka la buh jingeh bha bad dkoh lut ki kam ki jam.
Haba ïa dei bad ki lynti ki synkien kum ka seng ka la pynsngew ha u EE ka PWD (Road) ba un skhimkhia lem ban pynbha ïa ki surok kiba la sdang ban jot bad na ka liang jong u ruh u la kular ba un sa leh ïa kata bad u la pan ruh ka jingïatreilang khnang ba ka kam kan long kaba ïaid beit ïaid ryntih.
