Ba thungkam ka Post Office kum ki GDS ha West Khasi Thoh ka HYC sha ki Rangbah Shnong ban ym ai NOC ïa ki 120 ngut ki bar jylla

Nongstoiñ, Naitung, 20: Ka Hynñiewtrep Youths Council (HYC) West Khasi Hills District, ka la pynpaw ïa ka jingsngewkhia ba ha ka dong ka thaiñ ha kine ki bnai ban wan, kin wan ki bar jylla ban trei hapoh West Khasi Hills.
U President jong ka seng u Bah Lumlang Kharsyiemlieh u la ong, kumba 120 ngut eiei na ka bynta ki 42 tylli ki shnong kiba don ha West Khasi Hills, ha kaba kine ki briew ba nabar ki ïoh ban trei hapoh ka thaiñ West Khasi Hills.
U la ong ba kine ki briew kiba nabar jylla ki wan trei kum ki Gramin Dak Sevak (GDS) ba la thung da ka Post Office.
Ïa kane ka GDS lah ban shu aplai online bad la shim tang ïa ki Merit List kaba mut yn shim tang kiba heh mark. Kumta kine kiba nabar ki ïohlad ha kane ka bynta bad kane ka post kaba dei ka kam ban sam shithi ha ki bynta jong ki shnong hapoh West Khasi Hills.
U Bah Lumlang u la ong, ban khanglad ïa kine kiba nabar ba kin ïoh trei hapoh ka thaiñ, dei tang lada ki Rangbah Shnong ki nongshong shnong jong ka thaiñ, kin ym ailad ban shong hapoh ka thaiñ, khamtam ban ym ai NoC ïa ki bar jylla kiba trei kum ki GDS ban long kum ki nongshong shnong ne ki nongshong wai hapoh ka thaiñ.
“Ka Seng ka kyrpad ïa ki nongshong shnong lyngba ki Rangbah Shnong bad ki Secretary shnong, ba phim dei ban ai NOC ïa kine. Lada phi ai lad, kan ktah ïa ki khun samla jong ka jaidbynriew jong ngi khamtam ïa ka thaiñ jong ngi. Ka Seng ka la pyllait ïa ka shithi ban phah sha ki shnong ha ka 17 tarik Naitung kaba dei ka sngi ïap kaba 188 snem jong u Tirot Sing Syiem,” u la ong.
“Ka Seng ka da kyntu jur ïa ki Dorbar Shnong ba kin bud ïa ka nuksa jong u Syiem Tirot Sing uba ïada ïa la ka jaidbynriew jong ngi,”, ong Bah Lumlang.