Jowai, Naitung, 14: Ka Hynñiewtrep National People Federation (HNPF) West Jaiñtia Hills ha ka khubor ba ka phah da u President ma Newoneborn Suchiang la ong ba ka seng ka jingpyrshah jur halor ka jingthmu jong ka sorkar ban pynpoi lynti Rel shapoh ka jylla lyngba ka East Jaiñtia Hills District.
U President ula ong ba ka jingwan ka Railway kam lah ban pynmyntoi ïa ki paidbah ka Jylla hynrei kadei ka long tang kum ka jingailad ïa ki bar jylla ba kin ïoh ban wan buhai shnong hapoh ka Ri jong ka Jaitbynriew.
U la ong ba wat na ki thaiñ jong ka Ri-Bhoi kila pyrshah jur ïa kane ka jingthmu wanrah lynti rel, kumno pat ka sorkar kala pyrshah ban wad lad da kaba pynpoi noh lyngba ka East Jaiñtia, halor kane ula ong na ka liang ka HNPF kam lah ban pdiang satia.
Shuh shuh ula ong kumba long mynta ka jylla ka dang biang hi ka rukom pynpoi ïa ki mar bam mar dih da kaba ym donkam satia ïa kata ka lynti Rel kala lah ban buh jingma pynban ïa lawei jong ka jaitbynriew na ka jingwan rung tuh ki mynder na Ri Bangladesh.
