Mawkyrwat, ‘Nailar, 17: Ki Samla jong ka Kur Syiemlieh Saw Kpoh (SKSSK) Maharam Syiemship ki la pynrem jur ïa u Syiem bad ïa ka Executive Committee (EC) jong ka Dorbar Hima Maharam halor ka jingthmu ban ai jaka sha ki shipai BSF ha Photmula, kaba hap hapoh Ranikor Civil Sub-Division, South West Khasi Hills District.
Ha ka 14 tarik, ‘Nailar 2025, ka EC jong ki Samla Kur Syiemlieh Saw Kpoh Maharam Syiemship ka la shong jingïalang kyrkieh ha Mawkyrwat bad ha katei ka jingïalang ki la pynrem jur ïa u Syiem bad ïa ka EC jong ka Hima halor ka jingleh bym suidniew ïa ka aiñ kashari. Kane ka dei namar ba katei ka jaka ka dang hap hapoh ka jingïa-kajia (Case – Mokotduna) hapdeng u Syiem bad ka Kur Syiemlieh.
Ki Samla Kur Syiemlieh Saw Kpoh ki pynpaw ruh ka jingsngew lyngngoh halor ka jinglong khlem jingsngewthuh jong ka ophis Deputy Commissioner lyngba ka Revenue Department, namar haduh mynta hi wat ka Land Compensation jong ka Border Fencing ka dang sahkut ha District Court, Mawkyrwat.
U Secretary jong ki Samla ka Kur Syiemlieh Saw Kpoh, u samla Stepping Stone Syiemlieh, uba dei u haba kren sha ki lad pathai khubor, u la pynpaw ïa ka jingpyrshah kaba jur halor kane ka jingai jaka sha ki shipai BSF. U la kdew ruh ba ka Kur ka don ki dulir (document) kiba lah ban pynshisha ba ka long trai hi ïa katei ka jaka.
Katkum ki dulir, ka Kur Syiemlieh Saw Kpoh ka don ïa ka jingthied jaka naduh u snem 1840, kaba la thied da I Mei-ieid Wanrani Syiemlieh na ka Phan Syiem, kaba kyrteng ka Munai Lang Shnong Ranigarh ha ka 5 tarik u Kyllalyngkot, 1840.
U la ong ruh ba ka ïew Photkroh, kaba dei ka ïew trai jong ka Kur Syiemlieh Saw Kpoh, ka long kaba la tip da u Syiem bad ka Hima hi ruh. Hynrei naduh u snem 1999, da ka jingïamynjur lang jong ka Dorbar Hima bad ka Kur, la shah ïa ka Hima ban pynïaid ïa katei ka ïew, hynrei dei ban siew 40% na ka shispah sha ka Kur Syiemlieh Saw Kpoh. Hynrei haduh mynta ka jingïakut kam treikam bad ka Hima ka la kam trai beit ïa katei ka ïew.
U samla Stepping Stone Syiemlieh u la kdew ruh ïa ka Court Order jong u snem 1938, ha kaba ki myntri bad ki Elector jong ka Hima Maharam ki la soi bad mynjur ba katei ka jaka ka dei ka jaka shimet (Private Land) jong ki Kur Syiemlieh bad Syiemiong. Ha katei ka hukum la kdew ba “ka long kaba sang lada knieh ïa kane ka jaka.” Kane ka hukum ka la mynjur bad soi kyrteng da 42 ngut ki myntri jong ka Hima ha kata ka por.
Na ka liang jong ki Samla jong ka Kur Syiemlieh Saw Kpoh, ki pynrem jur ïa kane ka jingleh donbor jong u Syiem ryngkat ka Executive Committee jong ka Hima, kiba la ïuh-roit ïa ka hok jong ka Kur. Ki la pynpaw ruh ba kum ka Kur ki ïeng skhem halor ki kot ki sla ban pynshisha ïa ka jinglong trai jong ki. Lada don kiba pyrshang ban khanglad ïa kane ka hok, kin ym shongthait ban ïakhun ban ïada bad bat skhem ïa ka jinglong trai jong ki, da kano kano ka lynti ruh.
