Shillong, Naiwieng 11 : Ki nongïalam jong ka Meghalaya Cricket Association (MCA) ha ka sngi Ba-ar ki la leit ban kynduh ïa u Myntri Rangbah ka Jylla Conrad K Sangma ban pynpaw ïa ka jingsngewkhia na bynta ki khynnah ïalehkai kriket ka jylla namar ka buh jingeh bha ïa ki na ka jingïatakhuh ka jingpule khamtam ki eksam bad ki prokram ïalehkai kiba la buh da ka Board of Control for Cricket in India (BCCI).
Haba ïadei bad kane, na ka lïang ka MCA hapoh ka jingïalam u Honorary Secretary Bah Rayonald Kharkamni ki la aiti ruh da ka dorkhas ha u Myntri Rangbah ha ryngkat ka jingsakhi lang nongai buit jong u, Bah Hamletson Dohling ba dei ruh u President ka Meghalaya Football Association bad kumjuh u Myntri ka tnad Sports ka Jylla, Bah Wailadmiki Shylla.
Hadien ba la ïoh ïa ka jingpynshai, na ka liang u Myntri Rangbah, u kular ba un shim khia, kaban long kum shi bynta ban plie lad wat ïa kiwei ki samla ïalehkai.
Na ka liang ka MCA, ha ka shithi kaba ki la ai sha u Bah Wailadmiki Shylla, ka pynpaw ba ki khynnah ïalehkai kriket ba dang leit skul, ki donkam bha bunsien ban don ha ki prokram ïa kilan bad hap ruh ban leit ïalehkai shabar na ka jylla. Kumta kane ka ju jia ryngkhat bad ka ïa takhuh bha khah khah bad ka jingpule ka jong ki, khamtam lei lei ki eksamin jong ki Board, kaba bun na ki khynnah ki mad ban shem jingeh ban pynbiang lang ïa kine ha ka juh ka por.
Kumta ha kane ka shithi, ka MCA ka kyntu ïa ka sorkar ba kan shong pyrkhat ne ban ailad ïa ki khynnah ban shong da kawei pat ka eksam kaba kyrpang ïa kaba lah ban pynlong ïa ki ha ki sngi bad ki por ba kham shadien.
Ïa kane ka mat, ka MCA ka la pynsngew ruh sha ka tnat pule puthi, ba kan ïarap ban shimkhia lem, ne ban da thaw syndon da ka mat treikam, kaban long kum shi bynta ban ïarap ne ban kyrshan lem ïa ki khynnah ba ïalehkai kriket ha ka por ba ki mihkhmat ïa ka jylla shabar na la iing.
