Khliehriat Naiwieng 6: Ki dkhot jong ka Jaiñtia National Council, Khliehriat Circle, hapoh ka jingialam u Working President, u bah Diamon Bareh bad u Vice President, u bah Shanbor Langstang mynta ka sngi hadien bala ioh ïa ka jingujor na ki paidbah halor ka jingbakla thoh ïa ka kyrteng Shnong Khliehriat ha ka signboard jong ka Slice Small Finance Bank ha Khliehriat, EJHD, ki la leit mar mar bad pyndam noh shi syndon ïa ka jingthoh kaba bakla ban spel dak namar ha ka jaka ban thoh Khliehriat ki nongtrei katei ka bank ki la thoh pynban Khelerihat.
Na ka liang ka seng kala bthah ruh ïa ki nongtrei jong katei ka bank ba ki dei ban phah shna noh da kawei pat ka signboard ba thymmai bad dawa ruh ki dei ban da pynbeit bha ïa ka jingthoh ha signboard halor kane ka seng ka la ai por ïa ka bank ba dei ban leh noh hapoh shi bnai namar kane ka jingbakla ban spel dak kan ialam bakla bad kan wanrah ka jingduh noh ïa ka burom ba khraw jong ka shnong Khliehriat kaba dei ka head quarter jong ka East Jaiñtia Hills District.
Lah bthah ruh ïa ka bank ba ka dei ruh ban pynbeit ïa baroh ki signboard, ki kot ki sla bad ki digital platform jong ka Bank.
Ka seng ka Maham ruh ïa ki dukan, ki ophis, bad ïa kiwei kiwei ba ki dei ban da thoh shai ïa ka kyrteng shnong da kaba beit bad lada lap ïa kino kino kiba leh bakla ka seng ka pynshitom ïa ki katkum ki kyndon.
