Mawkyrwat, Jylliew, 25: Ka long kaei kaei kaba i sangsot ban peit bad ïohi ba ki surok ha kylleng ki jaka ki la sdang ban jot rathai la ka long ha ki por tlang bad khamtam eh haba wan ka lyiur namar na ka jinglynshop jong u slap bad na ka jingbym biang ki nur um ha kaba bunsien la sakhi ba ka um ka ju tuid ym na ki nur hynrei na ka surok.
Haba ïadei bad ka jingjot rathai jong ki surok na ka liang ki paidbah nongshong shnong, ki nongñiahkali bad kiba ju pyndonkam ha ka leit ka wan na kawei ka surok kaba dei ïaid na ïew Mawkyrwat sha Marshilong bad Nongbah-Marshilong bad kaba dei ruh lynti ban poi sha Jashiar na ka liang jong ki ki la pynpaw ka jingsngewdiaw shikatdei eh namar ka jingsniew palat jong ka surok kaba la dap sa tang da ki khoh-roh khoh-ram.
Na ka liang u nongthoh khubor haba ïoh sngew ïa ka jingud jingnam jong ki paidbah ba ka jingsniew jong katei ka surok ka la ktah shibun eh ïa ka ïaid ka ïeng ym banse ba lyngba kane ka jingthoh kan long ka lad ban pynsngew sha ki bor ba peit ba kin leh ei ei lem halor kane ka surok namar ka la long kaba sniew.
Shuh shuh ki paidbah nongshong shnong haba ki ïohi ba kiwei de ki surok ki long kiba bha, “balei pat ïa kane ka surok ym lah ban pynbha haduh mynta”? ki la buh jingkylli. Ha kajuh ka por ki sngew ban buh ka jingkyrpad ïa ka Sorkar bad ki bor ba dei peit ba ki dei ban leh ei ei noh halor kane ka surok na ka bynta ka bha ka miat jong u paid nongshong shnong.
Ym tang kata, ki la buh ka jingkyrpad ïa u nongmiihkhmat jong ka Mawkyrwat Constituency ba un sngewbha ban shimkhia lem halor kane ka mat da kaba thaw ki lad ki lynti ban pynbha noh ïa kane ka surok bad um dei kular tang ha ka por shwa ka elekshon namar bunsien la ju ïoh ba ki jingkular ha ka por elekshon ki long ki long ki bun hynrei ban pyntreikam pat ki long tang khyndiat.
