Ba sniew palat ka surok, da ki Pick-up bad ki kulai pyndonkam ki paidbah kiba ïaid na ka surok Wahkaji – Mawthabah

Mawkyrwat, Risaw 17 : Ka Joint Action Committee (JAC) kaba kynthup ïa ki 10 tylli ki shnong kiba don ha ka thaiñ Mawthabah, South West Khasi Hillls District ki la mat ïa shibun ki jingeh tang na ka daw jong ka jingsniew palat ka surok kaba don kumba 20 kms ei ei na Wahkaji shaduh Mawthabah.
Lah ban kdew ba ïa kane ka surok Wahkaji shaduh Mawthabah la pyntrei na ka Khasi Hills Autonomous District Council (KHADC) kaba dei naduh u snem 2003.
U bah Kaius Dkhar, Sordar jong ka shnong Nongtnger uba long ruh u dkhot jong ka JAC jong ki 10 tylli ki shnong haba kren ha ki lad pathai khubor ha ryngkat da ka jingïadonlang kiwei de ki ‘riew rangbah ki la pynpaw ka jingsngewdiaw namar ba kane ka surok ha kine ki sngi ba mynta ka la sniew sha ba palat.
Namarkata, halor kane ka jingeh jong ki paidbah ki la leit ruh ban pyntip bad pynsngew hapoh ka Khasi Hills Autonomous District Council (KHADC) ha kine ki bnai ba la dep ban kyrpad ban wan maramot noh ïa kane ka surok bad ïa ki jaka ba la sniew namar ba shibun ki nongshong shnong ha kane ka thaiñ ki la ïoh mat ïa ki jingeh ha ka leit ka wan khamtam lei lei haba kit ïa kiba pang ba shitom.
Haba bynrap ïa ka jingkren, u bah Kaius Dkhar ryngkat ki paidbah ki la pynpaw ruh ka jingsngewnguh ba na ka liang ka KHADC ka la kular ban wan jngoh ïa kane ka surok bad ha kajuh ka por ki la kyrpad ruh ba lada long kaba lah ka KHADC ka dei ban leh ei ei noh kham kloi ne ban wan maramot noh ha kane hi ka aiom tlang ka ban sa wan khnang ba ki paidbah kin nym ïa kynduh jingeh.