Ba slem ka jingpyllait pisa jong ka JJM : Kynduh EE ki Contractor ha Mawkyrwat

Mawkyrwat, Risaw 15 : Mynta ka sngi ka 15 tarik u Risaw, 2025 na ka liang ki Nongpyntrei ne Contractor kiba pyntrei ka Jal Jeevan Mission me ka JJM hapoh Mawkyrwat Division da ka jingsngewkhia ki la leit ban ïa kynduh ia u bah K. Nongbsaw uba dei u Executive Engineer jong ka PHE Mawkyrwat Division, South West Khasi Hills District.
Lah ban ong ba ka daw ba hakhmat jong ka jingleit ban ïa kynduh jong ki ïa u EE ka dei halor ka jingslem jong ki bill wat la hadien ba kiba bun ki kontraktor ki la pyndep hok ïa ki jingpyntrei jong ki ha ka por kaba biang kumba la bthah.
Namarkata, uwei na ki kontraktor haba kren sha ki lad pathai khubor kata u bah F.D. Ramsiej u la ïathuh ba don ki kontraktor ki la la pyndep ïa ki jingtrei la kumba ar snem bad don kiba la pyndep la bun bnai hynrei kaba sngewsih ka long ba haduh mynta kim shym la ïoh ïa ki pisa ne ki bill bad kane ka la wanrah jngeh shibun ïa ki namar ki don ki kontraktor kiba shu leit shim da ki ram na ki bank bad mynta ka la dei sa ka por ban siew sha ki.
“Ka bill kaba sah kut bad kaba la dep ban phah sha Shillong baroh ka la kot sha ka 48 klur tam tyngka”, ong u bah Ramsien bad ym tangkata, u la ïathuh ruh ba kane ka bill ka dei ka tang ka bill kaba la dep phah bad ki bill ba khlem pat phah ruh ka dang bun.
Kumta, ha kane ka sngi ki la shim ruh ka rai ba na ka bynta ki jingeh jong ki kontraktor hapoh ka thaiñ Mawkyrwat ki la rai ban leit ïakynduh noh ïa u Chief Engineer kumjuh ruh ïa u Myntri Rangbah ka jylla u Conrad Sangma ban kyrpad ïa ki khnang ban lah ban weng ïa ki jingeh ba ma ki ki ïa kynduh ha kaba ïa dei bad ki bill namar kumba ka long ma ki ki la pyndep hok ïa ki kamram kumba la bthah.