Ba siang rong torti surok Nongpoh – Umden, sngewkhia ka longkmie ba shah thngan

Nongpoh, K’lyngkot 17: Ka Kong Bindas Syiem ka longkmie kaba shah thngan ïalade ha u snem 2024 namar ka jingsyrtok ki paidbah ha shilynter ki shnong ka thaiñ Umden namar ka jingjot rathai u surok, hynnin ka sngi kala pynpaw ka jingsngewkhia kaba jur halor ka jinglong jingman jong ka jingpyntrei ïa u surok hadien bala lap ba ka rukom siang rong kala long kaba torti shi katdei bad ka jingstang ka rukom siang kaba lah ban pynjot tang katto katne por ïa u tei u surok.
Lah ruh ban kdew hangne ba ki paidbah kila pynsaphriang ruh ïaki video haki rynsan social media halor ka jingtorti ka rukom siang rong ïa utei u surok ha kaba ïaka rong kaba la dep ban siang nalor ba ka stang lah ruh ban shu khoh da ka kti namar la long kumba shu buh halor ka khyndew bad ka rong kam bit satia.
Tang hadien ka jingsaphriang ki dur bad ki video naka liang ka kong Bindas hynnin ka sngi lem bad katto katne ngut ki nongkyrshan jong ka kila leit ban jurip ïaki bynta ha ka shnong Plasha bad kumba la saphriang haki dur la lap shisha ba ka rukom siang ka long kaba torti bad kam ai jinghun ïaki paidbah bad kum ka long kaba la aiti ïalade ban pynioh ïa utei u surok da kaba shong shah thngan ïalade ka dap da ka jingsngewsih kaba khraw ban iohi ba ka rukom trei ka long kaba shut rei tang dep hadien ba ki bynta jong utei u surok lah ban shuh khoh tang da ka kti.
Haba kren sha ki lad pathai khubor naka liang ka kong Bindas ka pynpaw ka jingsngewnguh ïa u Blei u ba la lam lynti ïaka ban shim ïa kane ka ishu ban dawa siang rong ïa utei u surok bad kumjuh ruh ka sorkar Meghalaya kaba la pynsngap ïaka jingdawa bad mang pisa ruh naka bynta utei u surok, kaba long shisha katkum ka jingkular jong u Bah Prestone Tynsong, bad kum ki paidbah ki dap da ka jingkmen kaba khraw halor ka jingurlong utei u surok, hynrei kaba sngewsih ka long ba la lap pynban ba ka rukom pyntrei kam ai jinghun ïaki paidbah nongshong shnong khamtam ïa ka kaba la len lade ban shim ïaka rai ban shah thngan khlem pud.
Ka kong Bindas kala kyrpad ruh ïa u kontraktor ba pyntrei ïa katei ka kam ba un shimkhia ban trei bha kumba ki paidbah ki angnud bad khmih lynti ban ioh ïa u surok ba paka bad u ban neh slem.
Naka liang ka kong Bindas kala ong ruh ba kadaw bala pynlong ïaka ban mih bad ban jurip ka dei hadien bala saphriang ki dur haki social media bad lap shisha ba ka long kumba ki paidbah ki pynsaphriang, bad hadien ka jingïakren naka liang u kontraktor u la kular ban shimkhia bad ban lehbha ïa utei u surok bad ban khoh biang ha kitei ki bynta ba ka rong kam bit bad ban siang thymmai.