Nongpoh, Lber 12: Ar ngut ki briew kila mynsaw ha kawei ka jingjia aksiden kaba la jia hynnin ka miet ha Pahamsyiem, hadien ba kawei ka Auto Rickshaw kala shah tynrah nadien ha kawei ka kali Maruti Alto.
Kat kum ka khubor bala ioh lum la ong ba kane ka jingjia kala jia hynnin ka miet haka por 7 duna eiei ha kaba katei ka Auto Rickshaw kaba don ïa u number ML 10 A 7293 bala ñiah da u Bankerlang Kshiar na Mawpdang Ri-Bhoi District ka dang wan naka shnong Saiden ban kit briew, hynrei ynda poi ha Pahamsyiem katei ka Auto kala shah tynrah nadien ha ka wei ka kali Maruti Alto kaba don ïa u number WB 20 B 8521 bala ñiah da u Pynhun Marsing naka shnong Mawdiangum.
Ha katei ka jingjia 2 ngut ki briew ba shong ha katei ka Auto Ricksaw kila mynsaw ba kynthup ïa u Md Ramjan Ali (45) naka shnong Mawkapiah bad u Damewanshuwa Khriam (18) naka shnong Umjarasi.
Ki pulit ka Nongpoh Traffic Police tang mar sien ioh jingtip halor katei ka jingjia kila leit mar mar sha katei ka jaka ban pynlong ka jingtohkit bad pynkit noh ïa kitei kiba mynsaw sha Nongpoh Civil Hospital, hynrei namar ka jingmynsaw kaba la kham jur ïa u Damewanshwa la pynkit noh sha Nongbah Shillong ban ioh ka jingsumar ba kham paka.
Haka jingtohkit ki pulit bad hadien ka jingpyndep ïaka jingleh test la lap ruh ba utei u nongñiah katei ka Maruti Alto u don hapdeng ka jingshoh khawiang bad buaid kyiad.
