Ba shim khia u CEM ïoh bai bam tymmen biang ki MDC ba rim

Shillong, Nailur, 03: Ki phra ngut ki MDC barim jong ka Khasi Hills Autonomous District Council (KHADC) kiba la shah pynduh baibam tymmen, ha ka Sngi Baar ki la ai khublei kyrpang ïa u Chief Executive Member (CEM) jong ka Council u Bah Pyniaid Sing Syiem uba la shimkhia ban pynïoh biang ïa ka bai bam tymmen kumba la bthah da ka ïing bishar.
Kane ka kynhun ki MDC barim kiba la ïoh ïa ka baibam tymmen ki long ia u Bah Handle Mukhim uba long u MDC barim jong ka Sohryngkham, u Bah Sounderstrong Cajee u MDC na Mylliem, u Bah HF Marngar u MDC na Parïong, u Bah H.N Diengngan u MDC na Nongstoin, u Bah Phrang S. Warjri u MDC na Nongthymmai, u Bah JG Rynniaw u MDC na Mawshyrut bad u Bah Edar Nongbri u MDC na Nongkrem.
Ha jingïakren bad ki lad pathai khubor u Bah Handle Mukhim u la ong ba ha u snem 2002 mynba ki dang long ki MDC ki la wanrah ïa ka Bill kaba ïadei bad ka bai bam tymmen jong ki MDC bad kane ka bill ka la ïoh ruh ïa ka jingmynjur na u Lat jong ka jylla ha u snem 2006.
U la ïathuh ba naduh u snem 2006 shaneng ki MDC kim shym la ïoh shuh ïa ka baibam tymmen bad kane ka la pynlong ïa ka kynhun ki MDC barim ba kin leit tied ïa ka jingkhang jong ka ïingbishar kaba la bthah ïa ka District Council ban siew ïa ka baibam tymmen jong ki MDC barim katkum ki kyndon ba la don hapoh ka aiñ.