Shillong, ïaïong, 21: Ka Khasi Students Union (KSU) ha ka sngi Palei ka la dawa ïa ka Sorkar Jylla ban weng noh mardor ïa ki jaitbynriew Nepali kiba buhai shnong ha ka shnong Nongmynsong, Shillong.
“Ka KSU ka kyntu ïa ka sorkar ba ka dei ban weng noh mardor ïa ki Nepali kiba buhai shnong ha Nongmensong namar kine ki jaidbynriew ki ju pyndik na ka por sha ka por ïa ki Khasi ba luilui,” ong u kyrwoh ba la phah da u President ka KSU Nongmensong Unit u samla C. Khyriem.
Kane ka jingdawa jong ka Seng ka long hadien ka jingshah shoh pynkynmaw jong uwei u rangbah Khasi hakhmat ka Kurim hynnin ka janmiet sngi Balang ha ki briew ba la kynnoh ba ki dei ki bar jylla.
“Ka KSU Nongmensong Unit mynta ka janmiet (sngi Palei) ka la pynlong ïa ka jingwad bniah halor ka jingshah shoh uwei u rangbah Khasi lem bad i Kurim jong u ha ka kynhun ki riew thrangsnam ha Nongmensong mynnin ka janmiet ka 20 tarik u Ïaiong 2022 ha ka por 5:00 baje eiei,” ong u kyrwoh.
Ki nongïalam ka Unit ki la leit ïa kynduh ïa kine ki ar ngut ki Khasi kiba shah thombor ban tip kham bha shaphang ka jingjia bad ki la leit mih ruh sha Nongmensong Police Outpost ban buddien ïa ka ejahar ba la ujor da kine ki nongshah thombor.
“Ka KSU Nongmensong Unit ka la shem ba ki runar kiba bom bad tied jem ïa une u rangbah ki dei ki bar jylla kiba shong ba sah hi ha Nongmensong. La tip ruh ba napdeng ki kynhun jong kine ki riew pyntriem, tang ar ngut ki dang shah kem bad kumjuh ruh la thep ïa ki ha ki kyndon aiñ kiba jem bha,” ong ka Seng.
“Na ka liang ka Unit kan ïai buddien ïa kane ka jingjia bad lada ka aiñ kam lah ban ai ïa ka hok jong ki Khasi kiba shah thombor, ka seng kan sa shim da ki sienjam kiba tyngeh. Shuh shuh ïa kito ki Nepali ki bym pat shah kem, ka Unit ka kyntu ïa ki pulit ban kem noh mardor bad dei ban thep ha ki kyndon kiba eh bad lada ki pulit kim leh kumta, ka seng kam banse ban hap long pulit noh hi,” ong u kyrwoh na ka Seng.
