Nongpoh, Ïaiong 09: Na ka daw ka jingjia ha ka 7 tarik Ïaïong ba uwei u na ki nongniah kali kamai na ka kynhun All Khasi Meghalaya Tourist & Taxi Association uba la tip kyrteng kum u Ïajerlang Mylliew Umlong u la shah ktah kti ha Khanapara bad lyngba kane ka jingjia ka la poi sha u pud ba la mih ka jingkhang ïa ki Kali Tourist Assam ban wan kamai sha ki stand Tourist hapoh ka jylla Meghalaya.
Ban weng ïa kane ka jingïathud hapdeng ki nongkmai Tourist ka jylla Meghalaya bad ka Assam,ki nongïalam naki ar kynhun kata ka All khasi Meghalaya Tourist & Taxi Association na jylla Meghalaya bad ka kynhun All India Goods Transport Worker Association naka jylla Assam ki la ïa shong kyrkieh mynta ka sngi ha Nongpoh na ka bynta bann ïa kren sngewthuh ne pynbeit halor katei ka jingjia.
Haba kren sha ki lad pathai khubor, uwei na u nongïalam ka jylla Assam, u Biren Sharma, General Secretary ka Assam State, All India Good Transport Worker Federation, u la ong haba don kano kano ka jingjia la ka dei pyrshah ïa ki dribar na Assam ne Meghalaya ngi dei ban ïa kren sngewthuh jingmut bad kum kine ki jingjia donkam ban ïa pynbeit khnang ba kan nym ktah ïa ka shongsuk shongsan bad khamtam ba kan nym ktah ïa ki para dirbar ba ïa kamai kali paidbah na Meghalaya bad na Assam.
U la ong ruh ba kum kine ki jingjia ki shaid jia na ka por sha ka por bad ngim dei pat ban ïa sniew para bai a kamai paidbah bad ban nym ktah ïa ka kamai ka kajih ngi donkam ban ïa pynbeit bad ban pynïasuk khnang ba ka jingshakri ïa ki paidbah ba leit ba wan na Meghalaya bad Assam kan nym ktah ha ki sngi bad ki por ban sa wan.
U President ka All Khasi Meghalaya Tourist & Taxi Association, U Bah Ricaldinus Dohling, u la ïathuh halor kane ka jingjia ba shah ktah kti u Dirbar Khasi kaba la jia ha Khanapara, ha kaba la pyrshang ruh ban ïa kren sngewthuh bad ka kynhun kamai na Khanapara ban ïa pynbeit ïa kane kam, hynrei ka long kaba sngewsih ba na ka liang u President ka kynhun na Khanapara um shym la wan mih sha ka jingïakren kaba la pynlong ïa ka kynhun na Meghalaya ban khang pynsangeh kamai ïa ki Kali na Assam ban wan rung sha ki Stand ha Shillong.
Na ka liang u Bah Balajied Jyrwa, Secretary ka Ïaitylli Tourist Owners and Driver Association, u la ong ba kum kine ki jingia ka shaid jia na ka por sha ka por bad la ioh pat ban ïa kren sngewthuh jingmut bad ban weng na kum kine ki jingjia la rai ban thaw da ka Committee ban ïa pynbeit ïa kane ka kam ba kum kine ki jingjia kim dei shuh ban jia ha ki sngi bad ki por ban sa wan. Ha kane ka Committee ki dkhot ki dei ruh na ka jylla Meghalaya bad na Assam bad lada don kano kano ka jingjia ruh kin ïa kren bad pynbeit khnang ban wan ka shongsuk shongsain bad ban nym ktah ïa ka kamai ka kajih.
