Ba shah pynduh noh ïa ka Work Order ban shna Market Complex, pan jingpynshai ka NDC na u MDC bad KHADC

Mawkyrwat, Ïaïong 06 : Ka Nativity Development Committee (NDC) kaba hap hapoh ka jingpeit jong ka Parish Pastoral Committee jong ka Parish of Our Lord Parish Mawkyrwat, hadien jingïoh pdiang ïa ka shithi ba la shah pynduh noh ïa ka Work Order na ka bynta ban tei ïa ka Market Complex ha phyllaw jong ka Nativity Mawkyrwat da u MDC ka Mawkyrwat Constituency, u bah Pynkhraw Kharjahrin bad ba la soi da u Chief Engineer ka Khasi Hill Autonomous District Council ha ka 19 tarik u Lber, 2026.
Namarkata, ha ka 4 tarik u Lber, 2026 kane ka Committee ka la lum kyrkieh ïa ka jingïalang ban ïa kren sani kaei ba kin leh halor kane ka shithi. Kumta hadien ka jingïakren na ka liang u
bah Silvester Syiemlieh, Secretary ka Nativity Development Committee (NDC) ula ïathuh ba katei ka work order ka dei kaba ïoh na u bah Carness Sohshang uba dei u MDC barim ka Mawkyrwat Constituency ha ka 24 tarik u Kyllalyngkot, kaba dei T. 50/- lak tyngka na 15th’ Finance Commission Untied Grant – 1st’ Instalment jong u snem 2021 – ‘22 bad naduh katei ka por ka komiti ka la bud-dien ïa kane ka kam.
Ym tangkata, ki la ïakren ruh bad ïa u bah B. Syiemlieh uba dei u Junior Engineer ne JE uba dei peit ïa ka jingpyntrei ba un wan pyni ban sdang noh ïa ka kam hynrei na ka liang u JE ula kyllaiñ da kumne kumtai bad ai daw bym treikam ‘App’ na ka bynta ban leh ïa ka Geotag bad hadien ba ki la ap katto katne bnai ki la phone biang u. “Kaba sngewphylla ka long ba ula bthah pynban ban leit ïakynduh shwa ïa u bah Pynkhraw Kharjahrin uba dei u MDC ka Mawkyrwat Constituency ba mynta”, ong u bah Silvester Syiemlieh.
Haba bynrap ïa ka jingkren u bah Silvester Syiemlieh ula ïathuh ruh ba ka komiti ka la leit ban ïa kynduh ïa u MDC ba mynta la lai sien hynrei kaba sngewsih ka long ba ym don kano kano ka jubab na u. Kumta, halor ka jingbym ïoh ïa ka jubab kaba shai, ka komiti ka la leit ban ïakynduh noh ïa u CEM ka Khasi Hill Autonomous District Council (KHADC), u bah Winston Tony Lyngdoh ban kyrpad ban phah noh ïa ki engineer ba kin wan ban pyni bad ai laiñ ban sdang noh ïa ka jingtrei hynrei kaba sngewsih ka long ba hadien ka jingïakynduh ïa u CEM, na u ruh kam sym la don kano kano ka ka jingbthah na ka KHADC halor katei ka kam.
Kumta, ki la shim ka rai ba halor katei ka jingshah pynduh noh ka work order, na ka liang ka Nativity Development Committee ka kwah ban ïoh jingshai na u MDC bad ka KHADC ba kaei ka daw ba hap pynduh noh ïa ka work order ba la ai da ka EC ba rim bad kaei ka daw kaba kim shym la ai ïa ka jubab halor kitei ki jingthoh bad jingkyrpad jong ka komiti.