Ba shah pyndik ki nongñiah trok napoh ka South West lum jingïalang ka SWKHTO&DA ha Umlangmar

Mawkyrwat, Nohprah 20 : Ha ka sngi Palei jong ka taïew ka 19 tarik u Nohprah, 2025, na ka liang ka South West Khasi Hills Truck Owners & Drivers Association (SWKHTO&DA) ka la lum jingïalang paidbah ha Umlangmar kaba hap ha ka East Khasi Hills District ban ïa kren halor ka jingshah pyndik ki nongñiah trok napoh South West Khasi Hills District ha kine ki khyndiat sngi ha ki dkhot ka Meghalaya Commercial Truck Owners & Drivers Association (MCTODA).
Kumta ha kane ka jingïalang, na ka liang ki dkhot hapoh ka South West Khasi Hills Truck Owners & Drivers Association (SWKHTO&DA) ki la ïoh ban ïa kren bad ïathir sani bha kumno ban leh ha kaba ïa kaba ïa dei bad ka jingshah pyndik jong ki nongñiah trok bad kiei ki lad ban ki nongñiah trok ki don hapdeng ka jingshngaiñ haba ka leit ka wan.
Hadien ba kut jong ka jingïalang, u Bah S.F. Nongbri uba dei u President ka South West Khasi Hills Truck Owners & Drivers Association (SWKHTO&DA) haba kren ha ki lad pathai khubor, u la ong ba ka seng hi kam khang ïa ki trok ba na kiwei ki jaka ne na kiwei ki distrik ba kin wan kamai ha katei ka thaiñ Nongjri, hynrei tang kawei ba ki dei ban ïa burom lang ïa ka jingpynbeit hapoh ki karkhana, bad ka seng hi kam lah ban pdiang da lei-lei ban pyndik kumne ïa ki nongniah trok.
Namarkata, na ka liang u President ka Seng, u khot u wer ïa ki nongïalam ka Meghalaya Commercial Truck Owners & Drivers Association (MCTODA) ba lada ki don kano kano ka jingeh kim dei ban pynthut ïa ki nongñiah trok, hynrei ki dei ban wan shakhmat ban ïa kren bad ban pynbeit ïa ki jingeh, hynrei ymdei ban dei pat ka daw jong ka jingpynthut ïa ka jingïaid jingïeng jong ki para nongñiah trok.