Ba shah khot hajir ki nongïalam tur ki nongïalam bad ki dkhot ka KSU sha Thanad Nongstoiñ

Nongstoiñ, Naitung 22: Ar ngut ki nongïalam ba hakhmat jong ka KSU Nongstoiñ circle u samla Wilbest Wanñiang president bad u samla Commingstar Kharsyntiew secretary, ki la shah khot hajir ha ki pulit ha Nongstoiñ Sardar Police Station ha kane ka lah sngi u Blei ka 22 tarik Naitung.
Ha katei ka jingshah khot hajir kitei ki nongïalam kim shym la pyneh, hynrei ki la leit mih hakhmat u Officer Incharge ha ka por 11 baje mynstep bad ha katei ka jingleit jong ki, na ka liang ki dkhot jong ka seng ryngkat ki katto katne ngut ki nongïalam jong ka District ki la leit tur sha thanad ban synran lang ïa ki.
U samla Wilbest Wanñiang haba ïakren bad ki nongthoh khubor hadien ba ki la mih ha thanad, u la ong ki pulit ki la ong ba ka jingkhot hajir ïa ki, ka dei halor ka nongrim ba ki la leit ban khynra ïa ki bar jylla ha ka karkhana saiñ nar ha Rwiang, kaba la tip kum ka Shakambari Ferro Alloys Private Limited.
Utei u nongïalam ka seng u la ong ruh ba ka jingleit khynra ïa ki bar jylla, ka dei namar ba ki don bun bah kiba wan rung hapoh ka district ban trei ha ki kam bylla ba bun jait. Hynrei ki khlem pynbiang satia ïa ki kot ki sla kiba biang ha shuwa ba kin wan.
ejahar kaba la mudui da mano mano. Hynrei ka dei ka jingbthah jong ki bor ba halor, hadien ba ka jingleit khynra jong ka seng ïa ki bar jylla ha Rwiang ka la saphriang sted bha ha ki rynsan social media.
Utei u nongïalam ka seng u la ong ruh ba ka seng ka pynrem jur halor katei ka jingshah khot hajir. Ha kajuh ka por u la ong ba ka seng kan ym sangeh satia ban khynra ïa ki bar jylla kiba wan rung beaiñ hapoh ka district bad kam sngew ei ei, namar naduh ba ka KSU ka la sdang ban treikam ha West Khasi Hills naduh ki snem kiba mynshuwa eh, ka jingshah kem ha ki pulit bad ka jingshah pyngat kyndon ka long man ka por.
U samla Franklin Syiemïong secretary ka KSU West Khasi Hills pat u la ong, ba wat la ka sorkar ka ju pyntyrha na ka por sha ka por ïa ki nongïalam bad ki dkhot ka seng. Hynrei kan ym pyntieng ne pynsmiej ïa ka mynsiem ïaleh bad ka mynsiem shynrang jong ki dkhot ka seng, na ka bynta ban ïada ïa ka jaidbynriew na ka bynta ban im ka lawei bad ki pateng ban wan.
U la ong ruh ba ki nongïalam bad ki dkhot ka seng kim sngew phylla shuh ïa ka jingñion jong ka sorkar ïa ka seng, la ka dei ha kino kino ki bynta jong ka jingtrei kam, namar baroh ki nongïalam bad ki dkhot ki sngewthuh shai kdar, ba shisien ba ki la rung ha ka seng shilliang ka kjat ka don ha surok shilliang pat ka don ha phatok.
Nalor kata u la ong ruh ba katba ka sorkar ka dang ïaleh ban pyntroiñ, ka seng ruh kan nang tur shakhmat ban trei na ka bynta ka jingbha jong ka jaitbynriew khlem da kynran dien. Kan ïai bteng ban khang lad bad beh naphang ïa baroh ki bar jylla, ki nongwei nongar kiba wan rung hapoh ka district, ban shim kabu ïa ki kam bylla kam sngi, ka trei ka ktah, ka kamai kajih bad kiwei kiwei.