Ba shah-ieh-shrah ka thaiñ Warsan Lyngdoh phah tuklar ka SNS ha u Deputy Commissioner

Mawkyrwat, Risaw 08 : Ka Synjuk ki Nongsynshar Shnong Warsan Lyngdoh Area da ka jingsngewkhia bad don ka jingkitkhlieh ïa ka dong ka thaiñ bad halor shibun ki jingshah-ieh-shrah bad shah ieh-khun-swet ha kaba ïa dei bad ki kam pynroi na ka sorkar, ha ka sngi Balang ki la leit ban ïa kynduh ïa u Deputy Commissioner jong ka South West Khasi Hills District ban buh ka jingkyrpad ban pynsngew ïa ki jingeh ba ka dong ka thaiñ ka ïa kynduh.
Lah ban kdew ba kum ka dong ka thaiñ ka ïakynduh jingeh ka long ha ka ïaid ka ïeng lyngba ki surok ha kaba halor kane ka bynta la ong ba shibun ki surok ba ki ki donkam eh ban pynïasoh ïa ki shnong bapher bapher ha kaba ki don ki shnong da ki phew phew kilometres kim don ïa ka surok ba bha bad kane ka la wanrah ka jingeh ïa ki nongshong shnong ha katei ka thaiñ kum ha shnong Nongtnger, Nongryniang, Mawjai, Nongummer, Puinskei shibun kiwei de ki shnong ba marjan, ban ïakren lem sha ka sorkar ban wan buh Police Outpost ha Umdohlun ne Wahkaji,
Shuh shuh ha kaba ïa dei bad ki jaka pynlang ne thep pisa kum ka Meghalaya Rural Bank (MRB) ba na ka liang jong u Deputy Commissioner un ïa kren lem ïa ka MRB Mawkyrwat Branch ban buh shnat treikam noh ha ki thaiñ Warsanlyngdoh khnang ba ki paidbah kin suk. Ymtang kata, kum ka dong ka thaiñ ka la donkam ruh ban don noh la ka jong ka C&RD Block ha ki thaiñ Warsan Lyngdoh, kum ha Phlangdilion lane ha Umdohlun bad kawei de ban ïa kren lem ban kyntiew ne upgrade noh ïa ka Nongtynñiaw Upper Primary School sha ka Secondary School.
Hadien ka jingleit ban ïa kynduh ïa u Deputy Commissioner, South West Khasi Hills District, na ka liang u bah P.K. Bani Headman Mawjai uba dei ruh u Secretary jong ka Synjuk Nongsynshar Shnong Warsan Lyngdoh bad u bah Sandy Marthong uba dei u nongaiktien jong ka synjuk ki la ïathuh ba ha ka jingïoh ban ïa kren bad u Deputy Commissioner bad ki la pynpaw ïa shibun kiei kiei jingdonkam ba kum ka dong ka thaiñ ka donkam bad ym tang kata ki la pynpaw ka jingsngewkmen ba na ka liang jong u ruh u la kular ba un sa shimkhia halor shibun ki mat ba ki la ïakren bad ki kyrmen ruh ba ha kine ki sngi ban wan baroh ki jingkwah jong ka dong ka thaiñ kin urlong noh ban pynbiang ïa ki jingdonkam ha ka thaiñ Warsan Lyngdoh.