Ba sei madan ki pulit ïa ki kam poh, kynnoh kylla u Bernard ba thmu siat iap ki pulit ïa u

By Mawphor Editor On Jul 25, 2022

Shillong, Naitung 24 : Shi sngi hadien ba ki pulit ki la sei madan ïa ki kam poh , kam awria, kam jakhlia kiba la jia ha ka ïing Basa jong u Bernard Marak ka Rimpu Bagan kaba ha Tura, mynta une u Vice President jongka BJP u la kynnoh kylla ïa ki pulit ba ym dei ba u phet rieh ne tieng ban shah kem hynrei u ïada ban lait na ka jingshah siat iap ha ki pulit.
U la ïathuh ha ka miet ba ki pulit ki khynra ïa ka ïing basa jongu ka Rimpu Bagan, u OC ka Tura u la phone ïa u bad phah ba un leit pyndem ha Sadar Police Station, Shillong hynrei ha ka por ba u mih ban leit la wan ar tylli ki kali bolero bad kawei ka gypsy bad tur shajan jongu hajan Bethany Hospital ha ka por 12 baje shiteng synnia. U la ïathuh ba u tip shai ruh ba u dei u IGP Law and Order u M.K Singh.
“ Kumta nga la rieh ïa lade namar ka la ju ïoh jingtip ba ka don ka jingthmu ban siat iap ïa nga da ki pulit. U M.K Singh bad u Vivenkananda Rathore SP ka Tura ki dei ki briew jong u Myntri Rangbah bad la thung ïa ki ruh da kane ka jingthmu ban siat iap ïa nga kat kum ka jingtip ba nga la ïoh” ong u Bernard
U la ong shuh shuh “ La pynkhamti ha ki ïa ka bor ban siat iap ïa nga bad kem ïa ki nongkyrshan ka BJP. Kumta mar ïa ïohi ïa u Singh nga thikna ba ki thmu aiu re kumta nga la phet rieh. Balei ba un wan sha ka jaka sah jong nga shiteng miet bad kumta nga khlem ïa kynduh ïa u namar nga rieh. Kat kum ka jingkren jong u DGP ruh ka paw shai ba ki bud dien ïa nga ha Shillong bad Guwahati”.
“ Ka jingim jong nga ka don ha ka jingma na ki pulit, kumta nga la phet rieh ha katei ka miet ban lait na ki jingthmu ba sniew jongki, namar u Singh mynshwa ruh u la siat iap ïa saw ngut ki briew jong nga ha ka ‘fake encounter” ha Darengagal 2014. U la pyrshang la bun bun sien ban siat iap ïa nga ruh ha ka por ba u long SP ka Tura. Kim burom shuh ïa ka soskular ba la ïasoi da ka ANVC, ka sorkar pdeng bad sorkar jylla ruh ïa kaba ym pat urlong hi ruh haduh mynta” ong u Bernard.
“Kane ka jingiasylla sop sop pyrshah ïa nga ka long naduh ka por bym pat ïasoi ïa ka soskular ruh bad hadien ba nga la jop MDC na ka Constituency u Myntri Rangbah pyrshah ïa u kyrtong jongu bad la ïohi ba ki nongkyrshan ka BJP ki la nangkhlaiñ kaba la buh ïa u myntri rangbah ha ka jingma, la leh da kane ka kam ban khynra ïa ka ïing basa jong nga kata ruh haba ïa lade nga don sha Shillong bad ka jingthmu ka long ban pyndep ïa ka thong jong ki namar ki ju ïohi ba nga leit nga wan beit marwei. Ka la dei ka jingpynap shrip hynrei namar nga la phet rieh noh sha ki jaka ba shngaiñ ïa nga katta ruh ki dang bud dien beit ïa nga Mynta ruh ki la pynjulor ïa ki dukan jong nga, ki la kyndang da ki JCB sawdong da ka jingthmu ban pyntroiñ ïa ka kamai kajih jongnga bad ïa kiwei kiba im ja lang. Ki pulit ki la leh thombor ïa ki riewlum bad ki la kynnoh ïa ki khynnah kum ki nuti bad ïa ka ïing basa kum kata ka Brothel.
“Ka NPP ka kthong beit tang ïa nga bad wat ha GHADC ruh ki la pynduh lut ïa baroh ki hok kiba nga dei ban ïoh wat hadien ba nga la jop kum u MDC ka BJP. ïa nga ki ai tang 10 lak ka skhim katba ïa kiwei mar 1 klur. Ki la beh ruh ïaki nongkyrshan ka BJP na Diringga ha Tura ban pynheh ïaka MP Stadium wat la ka mukotduma ka dang sahkut ha ïing bishar High Court ruh. Kane ka paw shai ba kim kwah ba ngan ïakhun namar ba ka la buh ïa ka lawei jong u nongïalam ka NPP ha ka jingma” ong biang u Bernard.
U la ïathuh ba u la phah ïa kane ka shithi sha u SP bad DGP da ka mail ban pynpaw ba ym dei ba u phet rieh ne kiar ban ym shah kem ha ki pulit hynrei u phet ban ïada la ka jingim bad un sa wan phai da la pynthikna ban ai ka jingïada ïa u bad u kloi ruh ban ïatrei lang bad kano kano ka kynhun tohkit.
Lah ban pynkynmaw ha ka jingkhynra ki pulit ïa ka ïing basa jong u Bernard ka la long naduh ka miet 22 tarik Naitung haduh ka step 23 tarik Naitung 2022 bad ki la ïoh ban kem ïa 73 ngut ki briew ba kynthup 24 ngut ki kynthei bad ïoh ban pyllait im san ngut ki khynnah rit saw ki khynnah shynrang bad iwei i khynnah kynthei kiba la shah set ha kawei ka kamra ba dum bad jakhliah bha. Nalor kata ki la ïoh ruh ban kurup shibun bah ka kyiad phareng, ki beer, breezer bad 500 tylli ki condoms bym pat pyndonkam. Ki pulit ki la kurup ruh 36 tylli ki kali rit na katei ka ïing basa Rimpu Bagan.