Ba saphriang stet ka jingpang khmat, kyntu ka Health Deptt ïa ki paidbah ban husiar

Shillong, Nailar, 20: Hadien ba ka la don ka jingnang bun ki briew kiba ïabit ïa ka jingpang saw ha ki khmat lane ka Conjunctivitis ha kylleng ka distrik, ka ophis jong ka District Medical Health Officer, East Khasi Hills ka la pynmih ïa ka jingpyntip ïa ki paidbah kumno ba kin leh ban lait na ka jingïabit na katei ka jingpang khmat.
Katkum ka kyrwoh, la ong ba katei ka jingpang khmat (Conjunctivitis) kaba la tip kum ka ‘eye flu’ kadei ka jingpang kaba ïaphriang stet bha na uwei u briew sha uwei pat la ka long da kaba kynduh markhmat lane da kaba ktah ïa ki tiar kiba la don ïa utei u khniang jingpang.
Ki dak ki shin ki kynthup naduh ka jingsaw bad ka jingat ha ki khmat, ka jingjaw um mat, sngew daitbuid ha ka khmat, shem jingeh ban peit ïa ka jingthaba bad ki ‘irmat ki lah ban daitlang ha ka por mynstep.
Kumta na ka liang ka tnad ka la bthah ïa ki paidbah ba kin tip kiei kiba kidei ban leh bad kiei pat ba kim dei ban leh ban lait na ka jingsaphriang.
Kiba dei ban leh ki kynthup : Ban lehkhuid ïalade shimet da kaba saitkhuid ïa ki kti da ka sabon bunsien. Nangta lada ïabit ïa utei u khniang jingpang dei ban set kut noh ïalade ha iing bad kiar ban ïa kynduh ïano ïano katba pat koit ka jingsaw ha ki khmat. La bthah ruh ba lada kitei ki dak ki shin ki neh palat ïa ka san sngi lane shem shitom ban ïohi, jur ka jingpang bad ym lah shah ïa ka jingshaid nalor ba jur ki eitmat dei ban leit pyni mardor ha u doktor.
Kiba ym dei ban leh pat ki kynthup : Ban kiar na kaba ïa ai ïa ki tiar shimet ban pyndonkam lang. Kiar na kaba ktah ïa ka khmat, kiar ban pyndonkam ïa ki contact lense bad ban ym leit sha ki skul ne college, ophis ne jaka trei katba ka jingsaw ha ki khmat kam pat jah.
Kane ka long katkum ka kyrwoh ba la phah da ka District Medical and Health Officer ka East Khasi Hills, Dr. A Lyngdoh.