Ba sah thylli 3,367 tylli ki Sanction Post, buh jingkylli ka HYC ïa ka Sorkar MDA

Shillong, Nailur, 23: Ka Hynñiewtrep Youths Council (HYC) ha ka sngi Thohdieng ka la buh jingkylli ïa ka Sorkar Meghalaya Democratic Alliance (MDA) ba ïalam da ka National Peoples Party (NPP) halor ka jingpynslem ban pyndap ïa ki 3367 hajar tylli ki Sanction Post ha ki tnat treikam bapher bapher ka Sorkar.
“Katkum ka khubor ba la mih ha ka 1 tarik, Jylliew, 2022, la pyntip da u nongwad RTI ba ki don kumba 3, 367 hajar tylli Sanctioned Posts ha ki tnat treikam bapher bapher ka Sorkar kiba shu sah thylli bad dang shen ha ka Dorbar Synrai ba dang shu kut shen, wat u Myntri Rangbah ruh u kyntait ban ai ïa ka jingdon jong ki post ba thylli da kaba shu pyntip kyllum ba ki don kumba 3000 hajar eiei. Kine ki kam ba thylli ki dei ki Sanction Post bad lada kheiñ ïa ka jingpynlut ha kaba siew tulop shi snem tang sha uwei u nongtrei kan long kumba T. 4.40 lak bad namarkata, lada 3367 ngut ki nongtrei ka pisa kaba sah bad ka Sorkar ka long T. 1,481,480,000 klur ha ka shi snem,” la ong ka HYC ha u kyrwoh ba la phah da u General Secretary u Bah Roy Kupar Synrem.
Ka Seng ka la ong, ki skul ha Meghalaya ym tang ba kim biang hynrei ym shym la thung wat ïa ki nonghikai bad ïa ki nongtrei. “Ki khynnah skul kim ïoh ïa ka pule puthi kaba biang namarba ki don haduh 1,094 tylli ki post ba thylli tang hapoh ka tnat Pule Puthi ha kaba 36 tylli ki Lower Primary Schools ki ïaid khlem don satia wat tang uwei ruh u nonghikai. Kane ka dei katkum ka jingkren jong u Myntri ka tnat Pule Puthi ka Sorkar Jyllla hapoh ka Iingdorbar Thawaiñ,” la ong ka Seng.
“Lada ka Sorkar MDA kan pynkiew ïa ka jingpynlut pisa ha ka tnat Pule Puthi naduh ba la shimti ïa u lakam synshar ha u snem 2018, ka jingkylli kaba mih mynta ka long, balei ym shym la thung nonghikai? Kumno ka skul kan ym don nonghikai? Kaei ka ban jia ïa ka lawei jong ki khynnah skul ha ka jylla? Hato u Conrad Sangma bad ki Myntri jong u kin shim jingkitkhlieh halor kane,” la kynthoh ka Seng.
Ka Jylla Meghalaya ka wan balai ha ka jingjur ki kam runar ruser bad ki jingshah thombor ki kynthei ha North East bad ka wan baar ha ka jingdon ki kam runar ruser pyshah ïa ki khynnah ha North East katkum ka 69th Report ba la pynmih da ka National Crime Records Bureau, Ministry of Home Affairs na ka bynta u snem 2021.
Ka HYC ka la buh jingkylli ïa ka Sorkar namar ka jingbym pyndap ïa ki 2,780 tylli ki post ba thylli ha ka tnat Pulit.
“Ka jingpynbna ban pynrungkam ha ka post AB/UB Category hapoh ka tnat Pulit na ka bynta kaEastern Range bad Western Range la pynmih ha u snem 2019-2020. Hynrei ïa ki Admit Cards na ka bynta ka written examinations ban pynlong ïa kane ka jingthungkam dang pyllait haduh u snem 2022, hadien ka jingpynslem,” la ong ka Seng.
Ka HYC ka la ong ruh ba ka Meghalaya Public Service Commission ka la pynmih ïa ka jingpynbna ha ka 14 tarik, Nohprah, 2020 ban pynlong eksamin na ka bynta ki 327 ki post kaba dang sahteng haduh mynta.
“Ki samla wadkam na Tura, kiba aplai ïa ka post jong ka Surveillance Worker lyngba ka District Selection Committee (DSC), ki hap ban ap ïa ka result interview kaba la pynlong naduh u snem 2020.
Ka Seng ka la ong ruh ba wat ki nongtrei Casual jong ka Meghalaya Energy Corporation Limited kiba dang ap ïa ka jingpynskhem, katba u Symbud Myntri Rangbah u Bah Prestone Tynsong u la pyntip ba ki don palat 1,000 tylli ki Sanctioned Post kiba thylli hapoh ka MeECL ban thung na ka bynta ka post Junior Engineers, Assistant Engineers bad Executive Engineers hynrei ïa kine ki post ba thylli ruh ym pat lah ban pyndap na ka daw ka jinghiran pisa jong ka Corporation.
Ha kaba ïadei bad ka tnat ka Koit ka Khiah, ka HYC ka la ong, ïa ki Specialist Doctor jong ka Sorkar la thung kum ki Medical and Health Officers (M&HO) hapoh ka clause 3(f). “Ka jingshakri jong kine ki doktor, la ïoh jingtip ba ym shym la pynskhem wat hadien hynriew snem, da kaba pynduhnong ïa ki ban ïoh ïa ka jingpynkiew jingsiew bad kiwei kiwei ki jingmyntoi. “Haduh 137 tylli ki post Specialist Doctor kiba shu sah thylli hapoh ka jylla mynta da ki snem. Hynrei ym shym la leh eiei ban pyndap wat ïa kine ki post ba kongsan,” la kynthoh ka Seng.
“Ha ka Dorbar Synrai ba dang shu kut shen, u Myntri Rangbah um shym la lah ban ai ïa ka jingkheiñ kaba shai halor ka jingdon jong ki Sanction post ba thylli ha ki tnat treikam ka Sorkar naduh u snem 2018-2022. Kane ka pynpaw ba kim pat long kiba tbti bad ka jingbym don ka jingtreikam kaba shai ha ka synshar ka khadar. Ym tang ki samla kiba shah pynduh noh ïa ka hok ban ïohkam hynrei ïa ka pisa ba la mang ban siew tulop la pyndonkam noh shawei bad kane ka la wanrah ïa ka jingduhnong,” la kynnoh ka Seng.
“Shaei la pynlut ïa ka pisa ba la mang na ka bynta ki Sanctioned Post? Hato la pynlut ïa ka pisa sha ki tamasa bym larkam ban pynmyntoi ïa ki katto katne lane la bei pisa sha ki prokram bym seisoh? Ki paidbah nongshong shnong jong ka jylla ki kwah ban tip, Conrad Sangma, shaei ka pisa ka leit?” la buh jingkylli ka HYC.