Ba rai pynurlong ïa ki 14 tylli ki mat dawa, shah biang ka Shnong Umshangling ban wan bret ñiut

Nongpoh, Jylliew 16: Ka Dorbar Shnong Umshangling ha kaba khatduh mynta ka sngi ka la rai ban shah biang ban leit bret ñiut ïa ki jaboh ba mih na ki shnong ka sor Nongpoh, kaba dei hadien ka jingwan jurip bad ka jingïashong pyrkhat mynta ka sngi ha ka Conference Hall ka ophis u deputy Commissioner ka Ri Bhoi.
Shuwa ban ïa shong pyrkhat, naduh u MLA ka Nongpoh u Bah Mayral Born Syiem, u Deputy Commissioner ka Ri Bhoi, u Abhilash Baranwal, ki nongmihkhmat na ka tnad Urban, Nongpoh town Committee, ki nongïalam Shnong bad ruh na ka Shnong Umshangling, ka la leit ban jurip shuwa ïa ki jinglong jingman katei ka jaka theh ñiut ha kaba la lap ba ka la ktah shisha ïa ka koit ka khiah ki paidbah bad hadien kata ki la ïa shong pyrkhat bad ka Dorbar Shnong ka la rai ban shah biang ban theh ñiut hadien ba la rai ban pynurlong ïa ki 14 tylli ki mat jingdawa ka Dorbar Shnong Umshangling.
Kum ban pynpaw, ki shnong ba hap ha ka sor Nongpoh ki la kynduh mawsiang mynta la 5 sngi lynter, kaba dei hadien ba ka Dorbar Shnong Umshangling ki la khang ban wan bret ñiut ha katei ka jaka theh ñiut kaba don ha Umshanling, hynrei da ka jingtuklar lang la ïa shong pyrkhat bad ruh ba ka Shnong ka la rai ban ai lad biang ban bret ñiut da kaba buh ïa ki 14 tylli ki jingdawa ba dei ban pynurlong shuwa ban sdang biang ban leit bret ñiut.
Haba kren sha ki lad pathai khubor, u MLA ka Nongpoh, u Bah Mayal Born Syiem, u la ong ba hadien ka jingjurip bad ka jingïashong pyrkhat ka Shnong Umshangling ka la ai lad biang ban bret ñiut bad kata ka dei ruh hadein ba la kular ban pyndep ïa ki jingdawa ba la buh da ka Shnong.
U la ong ruh kum u MLA bad ka ophis u Deputy Commissioner ryngkat kiwei kiba don bynta kin sa shim khia ban ïa kren halor ka ka jingeh jong katei ka shnong bad khamtam ban peit pyrman bha ïa ka jingwan theh ñiut ha kaba la buh da ka Monitoring Committee ba khlieh da u Deputy Commissioner khnang ba ka jingleit bret ñiut kan long ha kata ka rukom kaba paka bad kaba yn nym ktah ïa ka koit ka khiah ki paidbah Nongshong shnong.
Shuh shuh, u la bynrap ruh ba ngi hap ban shim khia ïa kane ka kam kaba ktah ïa ka koit ka khiah bad ïa ki paidbah bad wat la ym pat lah ban pynurlong ïa baroh ki jingdawa bad kin shim khia ïa ki jingdawa ba hakhmat eh ban pynurlong kaba long katkum ka jingangnud jong ka shnong,
Na ka liang u Bah Vincent Sohkhwai, Secretary Shnong, u la pynthikna ba ïa mynta hadien ka jingïashong pyrkhat ha Conference Hall ka ophis u Deputy Commissioner, ka shnong ka la rai ban ailad biang ban wan bret ñiut bad wat la kata ruh dei ban pyndep shwa ïa ki jingdawa ba hakhmat kum ka jingpynkhuid shwa ïa ki jaboh ba la bret pathar, ban pynbha ïa ka surok ba pynïasoh sha katei ka jaka theh ñiut bad ruh ban thung briew 2 ngut ban buh da ka khyrdop khnang ba kin peit pyrman ïa ki nongwan bret ñiut ba ki hap ban bret ha kata ka rukom kaba yn nym ktah ïa ka koit ka khiah ki paidba, kumba ki lad mad ïa ka jingsma iwtung baroh shi katta kaba dei na ka jingwan bret pathar ïa ki jaboh ha katei ka jaka theh ñiut.