Ba pynsyier ka mei mariang, thaw Komiti kyrkieh u CM

Shillong, Jylliew 16: Ka jinglynshop bad ka jingpynsyier ka mei mariang ha kine ki 24 kynta baladep, ka la pynlong ïa ka sorkar ban thung sa ïa ki Regional Committee ban peit halor ki jingshah pynjulor ha kylleng ki Distrik jong ka jylla.
U Myntri Rangbah, u Conrad Sangma, haba u la ïoh khubor ïa ka shah pynjor ha kylleng ki jaka, u la thaw saw tylli ki Regional Committee. Kawei ka Regional Committees kan kynthup ïa ka East Khasi Hills and Ri Bhoi Districts ban khlieh da u Myntri Rangbah Symbud, u Prestone Tynsong, Kawei pat kadei baroh artylli ki District ha Jaiñtia Hills ban khlieh da u Bah Lahkmen Rymbui, Myntri kam pohïing bad yn ïarap da u Bah Kyrmen Shylla, Myntri ka tnad Revenue. Ka West, South West and Eastern West Khasi Hills District kan hap ha kawei ka Committee ban khlieh da u Bah Renikton Lyngdoh Tongkhar bad Committee jong ki District ha Garo Hills yn khlieh da u James Sangma, Myntri ka tnad ka Koit ka Khiah. Ki MLA, ki DC bad ki SP na ki District kin long ki dkhot jong ki Committee. U Myntri Rangbah u la bthah ba ki Chairman jong ki Committee kin leit peit ïa ki jaka ba shah ktah na ka jingpynjulor ka mariang bad ban ïakynduh khah khah ha ki District.
Ha kajuh ka por u Conrad u la bthah ïa ki DC bad ki tnad treikam bapher bapher ban peitngor bha ha kine ki 72 kynta ban wan.
DKUT KA SUROK LUMSHNONG: Hadien ka jingbom u slap ha kine ki sngi baladep, mynta ka sngi, ka surrok National Highway na Khliehriat sha Silchar, ka la dkut thui ha Lumshnong hajan ka khyrdop lum pisa. Ka jingdkut kane ka surok, kadei hadien ba ka um kaba tuid na ki bynta kiba sha jrong ka la ksam thliew na shapoh bad ka surok ka la peit thliew haduh ban da dkut. Artylli ki kali, kawei ka kali rit bad ka trok ki la hap ha katei ka jaka ba dkut. Nalorkata ka surok ka la twa ruh na sha ka bynta ba long riat bad ym lait kali shuh ban ïaid bad ki paidbah nongleit jingleit ruh ki la sahkut noh rheng ha katei ka jaka.
Katkum ki khubor la ïathuh ba u draibar bad u handyman jong kane ka trok, ki la jah rngai.
ïap 4 ngut ha Nongspung: Kane ka jinglynshop ka mariang ka la ktah khamtam ha ka Shnong Nongspung, Mawphlang C&RD Block ha kaba kawei ka ïing ka la pra na ka jingtwa bad tuid kynsan ka khyndew sha kane ka ïing. Ha kane ka jingjia saw ngut ki shipara ki la ïap, kiba dei ki khun jong i Kong Kesfulda Kharmyndai bad u Bah Nikstanlang Jyrwa. Kine kiba khlad ki kynthup ïa iba 9 snem, 8 snem, 6 snem bad 4 snem. Ine iba 8 snem i la khlad ha ka lynti ban leit sha Hospital. Kiba la mynaw ki kynthup ïa u kpa bad 3 ngut ki khun. Iwei i khun iba dang 1 snem 6 bnai, iba ha ka por ba twa ka ïing u dang thum u kpa, im shym la mynsaw. Kane ka la jia ha ka por 10 baje ne 10:30 mynstep, katba ka kmie dang sainjaiñ shabar.
Kane ka jingjia ka la wanrah ka jingkyndit bad ka jingïam briew kaba jur ha ka Dong Laitlarem kaba don ha Nongspung.
Na ka liang u Myntri Rangbah ka jylla, u la pynpaw ka jingsngewsih kaba jur halor kane ka jingjia bad u la kular ruh ban ai jingïarap mar 4 lak iwei iwei kiba la khlad.
Ki bor jong ka mariang, ki la lynshop ruh sha South West Khasi Hills District, haba iwei i longkmie, iba kyrteng i Kong Hailsentinari Marweiñ, 25 snem ka rta, i la khlad noh na ka jingtwa khyndew ïa ka ïing ha Jashiar ha ka surok na Jakrem sha Mawthawpdah. I Kong Marweiñ i dang shet jingshet ha ka por ba twa ka khyndew ïa ka ïing. Ki khun jong i, arngut kim shym la don ha ïing ha katei ka por bad la ïathuh ba ki dang leit tong doh sha wah Rilang.
Ka jingjur u slap, ka la wanrah ruh ka jingshlei um ha kylleng kylleng ka jylla bad kumjuh ruh ka jingtwa ki surok ha kiba bun ki jaka.