Ba pynsangeh ka Karbi ïaka jingpyntrei surok ha Khatkasla-Psiar

Jowai, Nohprah 03: Ka Jaiñtia Students’ Movement (JSM) sengkmie mynta ka sngi Balang kala phah da ka jingthoh sha u Deputy Commissioner ka West Jaiñtia Hills District u Abhinav Kumar Singh, IAS halor ka jingleh ka Karbi Students Association (KSA) ban pynbor ïaka Karbi Anglong Autonomous Council (KAAC) ba kan pynsangeh ïa ka jingshna surok ka Sorkar Meghalaya ha Khatkasla-Psiar kaba hap hapoh ka Laskeiñ C&RD Block, hadien ka jingleit jngoh jong ka KSA haka 1 tarik u Nohprah 2025.
Katkum katei ka kyrwoh bala phah sha ki lad pathaikhur da ka JSM la ong ba ïa katei ka jingshna surok da ka tnad PWD Meghalaya la sdang ha u bnai Naiwieng, 2025 naduh ka jingkieng Kurelia Khatkasla haduh ka jaka khappud jong ka shnong Psiar-Mowluber haka jinglut kaba Rs.4 klur 57 lak tyngka.
Halor kane ka seng ka kyrpad jur na u DC ban un shimkhia mardor ïa kane ka kam bad ban pynthikna ba ka jingpyntrei ïa ka surok kan nym shah khanglad ha ka KSA, KAAC lane ha kino kino ki kynhun kiba kynthup ïa ki pulit Assam.
Ka seng ka kyntu ïa baroh ar liang ban pynneh ïa ka shongsuk shongshngaiñ ha kitei ki jaka khappud bad kino kino ki kam pynroi kin long kiba ïaid beit ïaid ryntih.
Ban lait na ki jingïakhajia hapdeng ki jaitbynriew kiba im ha kitei ki jaka khappud ka seng ka dawa na u DC ban un shimkhia mardor ïa kane ka kam bad ban pyndep hok ïa kane ka projek shna surok khlem kano kano ka jingshah khanglad.