Ba pynmih jingpynbna ka Sorkar khlem da ïaphylliew jingmut, bitar ki nongri masi khem dud

Shillong, Jylliew, 14: Ki nongri masi khem dud kiba don hapoh ka shatri jong ka East Khasi Hills District Milk Union (EKHDMU) ha ka Sngi Balang ki la pynpaw ïa ka jingsngew bitar halor ka jingpynmih jong ka tnat Animal Husbandry and Veterinary ka Sorkar Jylla ïa ka jingpynbna paidbah ba yn ym shah shuh ban die ïa ka dud Masi na ka daw ka jingpang at snieh noh ha ki masi ïa kaba la tip ruh kum ka Lumpy Skin Disease, khlem da ïa phylliew jingmut shwa bad ki nongri masi bad ha kajuh ka por ruh khlem da leh shwa ïa ka test ba ka long kaba bit neem ban dih ïa ka dud masi ha shwa ban pynmih ïa ka hukum katba ïa ka dohkha la leh shwa ïa ka test bad la pynmih ïa ka hukum ban khang die ïa ka dohkha.
Ka tnat Animal Husbandry and Veterinary lyngba u Secretary u Dr. Manjunatha C. ha ka 11 tarik mynta u bnai ka la pynmih da ka jingpynbna paidbah ba la khang ban die ïa ka doh bad ïa ka dud masi na ka daw ka jingpang at sniehnoh ha ki masi.
Ki nongri masi khem dud ki la pynpaw ba kane ka jingpynbna kaba khlem da ïa phylliew jingmut ka la wanrah ïa ka jingduhnong kaba khraw ïa ki nongri masi namarba ha ka shisngi ki hap ban aibam bad ban bsa ïa ki masi da ki hajar tyngka lada duna ki masi ba ki ri hynrei lada dei ïa kiba ri kham bun ki masi ka la ktah da ki lak tyngka ka jingduhnong.
Ki la ïathuh ruh ba ka dud kaba ki khem ki dei na ki Masi kiba koit ba khiah ym na ki masi kiba don jingpang namarba ka masi kaba pang kam lah hi ruh wat tang ban pynmih ïa ka dud.
Shuh shuh ki la ïathuh ba ka tnat Food and Safety ka la shim ïa ki nuksa jong ka dud mynta ka sngi hadien ba la pynmih ïa ka jingpynbna ha ka lah sngi U Blei mynta ka taiew.