Shillong, Nailur 20 : Ka kynhun ïalehkai jong ka Shillong Lajong FC ka la pynkut ïa ka jingmih madan jong ka ha ka Shillong Premier League da kaba pynliem haduh 4-0 kol ïa ka Malki kaba long mynta ka janmiet sngi Ba-ar ha madan Third Ground Polo.
Na kitei ki saw kol, ar tylli la thep da u Gladdy Kharbuli kawei ha ka minit kaba 33 bad kawei pat ha ka minit kaba 74, bud sa shi kol na u Samuel Vanlalpeka ha minit kaba 40 bad ruh shi kol na u Wadajied Ryngkhlem ha minit ba 69.
Shwa jong katei ka sngi, ka Malki ka don 10 point katba ka Shillong Lajong ka don 14 point. ka Malki kam shym lah shuh ban lait na ka jingshah pynhiar kyrdan lada ka jingïakhun ha katei ka sngi ka long kumno kumno ruh, katba ka Lajong pat ka tip ba ka jingjop kan ïarap ïa ka ban poi sha ka kyrdan kaba saw. Ka Lajong ka la ïoh ruh ban pynliem ïa ka Malki ha ka jingïakhun ha ka kylla kaba nyngkong kaba long ha ka 23tarik u Naitung.
Ka Shillong Lajong kaba don mynta 17 point ka don ha kajuh ka jingkamai point bad ka Ryntih SC hynrei na ka jingïapher ha ka jingïoh thep kol ka la ïoh ban tam shakhmat. Watla katta, ka Lajong ka lah ban duhnoh ïa ka kyrdan kaba saw lada jia ba ka Nangkiew Irat SC kaba don mynta 16 point ka jop ïa ka Mawkhar ha ka jingïakhun la shai ka sngi ha ka kylla kaba ar. Ban shu phai dien, ka jingïakhun ha kylla ba nyngkong kaba long ha ka 19tarik Naitung mynta u snem ka Nangkiew Irat ka la ïoh ban pynliem haduh 3-1 kol.
