Shillong, Nailar, 24 : Ka Federation of Khasi Jaiñtia and Garo People (FKJGP) seng kmie ha ka step sngi Nyngkong ka 22 tarik, ka la leit ban jurip hi da lade ban shem ïa ka jingshisha kumba la saphriang ha ki rynsan social media ba ki ïa artylli ki painkhana paidbah ha marjan ka Mahavir Park lad Mawbah, la pyndonkam ei da arngut ki nongbuh dukan u Deepak bad u Jyoti kum ka jaka buh tiar.
Ka seng ha ka jingleit jurip ka la lap ba kine ki bar jylla ki la shu pyndonkam tuh ïa kine ki paiñkhana ban pynlong kum ka jaka buh tiar namar la khang da ka tala nabar, bad ki shu rung tang na kawei ka thliew kaba ki lah prong napoh ka Godown kaba ki don, bad ki la pynlong ruh ïa kane ka jaka kum ka jaka thiah jaka dem jong ki. ïa kitei ki ar tylli ki dukan ka la lap ba kine ki bar jylla ym tang ba kim don ïa ki kot ki sla kiba biang (trading license)
Ïa kitei ki paiñkhana kiba don ha syndah jong kitei ki dukan, la ai sngewbha da ka Rotary Club, bad ka Meghalaya Urban Development Authority ka la ai pynïaid ha u James Sylliang, phewse ka la pynlyngngoh ïa ka seng ban ïohi ba la ai pynban sha kitei ki nongshong dukan ban pyndonkam tuh.
U Assistant General Secretary ka FKJGP u Bah Reginald Kurbah haba kren sha ki lad pathai khubor u la ong ba lada ki bar jylla kim kwah ban shah khynra ïa ki dukan kim dei ban pynïoh daw. “Lada ki biang ïa ki kot ki sla bad ki leh hok ïa ka kam, ngin donkam leh aiu ban wan khynra kumne,” U la ong.
U Bah Reginald Kurbah u la buh jingkylli ïa ka MUDA ba balei haba lah aiti sha uta u Ba pynkylla jaka buh tiar ïa ka James Sylliang hynrei pynban la lap ba ha ka jaka ba kan long ka paiñkhana na bynta ban pyndonkam u paidbah, ka kylla pynban ka jaka pyndonkam jong ki briew ki bym biang wat ïa ki sakhi ki sabut.
Ka seng ka la khang syndon ía kine ki artylli ki dukan, da kaba kdew ba yn ai lad biang ban plie tad ynda ki la lah ban wanrah ïa ki kot ki sla ban pynshisha.
