Ba pynkheiñ soskular yn leit khang ka MALOT&LA ïa ki karkhana saiñ dewïong ha Maweit

Nongstoiñ, K’Lyngkot 05 : Ka jingwan ban shna ïa ki artylli ki karkhana saiñ dewïong ha ka thaiñ Maweit kawei ha ka shnong Lamjew bad kawei ha ka shnong Miangkaiñ ka la ai jingkyrmen ïa ki paitbah ka thaiñ ba lyngba ka jingdon jong kitei ki karkhana saiñ dewïong kan ai jingmyntoi ïa ki paitbah ha ki kam bylla kam sngi, nangta ka kyntiew ruh ïa ka ïoh ka kot jong ki nongshong shnong kiba don ïa ki par dew?ong ha katei ka thaiñ bad ïa ki nongbylla.
Kumta ha shuwa ba ki trai jong kitei ki karkhana kin pynïeng ki nongsynshar shnong ka thaiñ bad ki paitbah ki la thaw da kawei ka synjuk kaba ki la ai kyrteng kum ka Maweit Area Land Owners Traders & Labour Association bad ki la khot ïa ki trai jong kitei ki karkhana ban ïakren sngewthuh jingmut bad ban ïasoi ruh ïa ka soskular hapdeng jong ki bad ka Association.
La pynpaw ba ki lyngoh ba wat la kitei ki trai jong ki karkhana ki la dep ïasoi ïa ka soskular ruh kim shym la bud ryntih ïa ki kyndon ba kiba la buh ha ka soskular hynrei ki la pynkheiñ im im peit peit bad katei ka jingpynkheiñ jong ki ka la pynbitar ïa ki nongïalam jong ka Association bad ki paitbah.
Kumta mynta ka lah sngi u Blei ka 5 tarik Kyllalyngkot ki nongïalam ka Association ki la leit ban ïakynduh ïa u bah Garod LSN Dykes IAS Deputy Commissioner ka West Khasi hills ban buh da ka jingujor pyrshah ïa ka jingpynkheiñ jong ki trai karkhana ïa ka soskular ba ki la dep ïasoi.
U bah Anthony Umïong secretary ka Association haba ïakren bad ki lad pathaikhubor hadien ba ki la mih na kamra treikam jong u Deputy Commissioner u la ong ba hadien ba ki la ïoh jingtip ba ki trai jong kitei ki karkhana ki la sdang ban pyntrei kam bad ban thang dewïong khlem pat ïapynbeit bad ka Association ïa ki bynta ba don kam ba ki dei ban leh katkum ki kyndon ba ki la dep ïa soi kumta kim banse ban leit ïakynduh ïa u Deputy Commissioner ban kyrpad ba un tuklar lem halor ka jingpynkheiñ jong ki trai karkhana ïa ka soskular ba ki la dep ïasoi.
Ha kajuh ka por u la ong ba kum ka dak jong ka jing pyrshah ïa ka jingpynkheiñ jong ki trai karkhana ïa ka soskular ha ka sngi Thohdieng ban wan kata ha ka 9 tarik mynta u bnai ka Association ryngkat ki paitbah kin ïamih ban leit khnang tala shuwa shipor ïa kitei ki karkhana tad haduh ba ki trai kin da lah ban pynbit pynbiang ïa baroh ki kyndon ba ki la dep ïasoi bad ka Association bad ynda ki la dep ban pynbiang lut kin sa leit ban plie biang bad ban ailad ba kin pyntrei kam kumba ki kwah.