Ba pynkheiñ ïa ki kyndon ka JHADC, ujor ejahar ka HITO ïa ka Check Point Khliehtyrshi
Jowai, Naitung, 23: Ka Hynñiewtrep Integrated Territorial Organisation (HITO) ha ka sngi Ba lang ka la pyntip ba ka la ujor da ka ejahar sha u Superintendent of Police ka West Jaiñtia Hills hadien ba la lap bad sakhi ïa ka jingpynkheiñ ia ki kyndon ba la buh da ka Jaiñtia Hills Autonomous District Council ïa ka Taxation Check point kaba don ha Khliehtyrchi ba la shim wai da kawei ka riewshimet na ka bynta lai lai snem.
Ka seng hadien ba la bishar bniah ïa ki kyndon ka JHADC ka la lap ba la kdew shai ba ïa ki kali kiba shu ïaid lyngba ka Jaiñtia Hills kiba wan na Guwahati ban leit sha Silchar, Agartala, Aizawl kim don kam ban pyni ïa ki trading licence ne siew ïa ka khajna ha katei ka check point kaba don ha Khliehtyrchi West Jaiñtia Hills bad ha Sonapur East Jaiñtia Hills hynrei la buh ban talasi tang ïa ki kali kiwa wan ban kit ïa ki mar napoh Jaiñtia, hynrei ha ka 21 tarik Naitung 2025 la lap ba katei ka khyrdop kaba don ha Khliehtyrchi ka la shim pisa na ki kali kiba wan na Changsari Assam ban leit sha Agartala Tripura bad Aizawl Mizoram da kaba pynkheiñ ïa ki kyndon ba la buh bad shuh shuh la kdew ha ki kyndon ba ïa katei ka kam dei ban leh daki officer ba la bynshet da ka JHADC hynrei ym don u wei ruh u Ophisar ne nongtrei jong ka Council kiba la buh ha kitei ki check point.
Lah ban kdew ba ha katei ka kyndon ba la buh da ka JHADC la kdew ruh ba lada lap ba pynkheiñ ïa ki kyndon yn weng noh ïa ka soskular ba la ïasoi ha pdeng ka JHADC bad ki nongshim wai kiba pynïaid ïa kitei ki khyrdop.
Kum ban shu pynkynmaw ba ka jingkyrduh pisa ka JHADC kam da dei eh ka jingkyrduh hynrei ka sei ka jingbymnang ban pynïaid ïa ki khyrdop lum khajna dalade bad ka jingai wai sha ki riew shimet ka dei tang ka buit sainti jong ki katto katne ngut ki MDC liang shynshar kiba kwah ban kamai ïalade ha ka kyrteng ka JHADC katba ka Council pat kat nang ïaid ki por ka la nang ringsdot.
“Ngi don ki sakhi sabut kiba biang ban pynshisha ïa ka jingdon kti ki MDC liang shynshar ha kane ka kam bamsap bad yn sa poi ka por ngin sa sei madan lut ïa baroh ki jingjyrsieh hapoh ka JHADC,” la bynrap u General Secretary ka HITO Seng Kmie u Bah Wanbun N. Dkhar.