Shillong, Lber 22 : Ka Hynniewtrep Integrated Territorial Organisation (HITO) da ka mynsiem kaba sngewkhia ka la ai ka jingujor shaka Chief Secretary ka jylla I Kong Rebecca V Suchiang halor ka jingpyndonkam bakla ïa ki kali sorkar hapoh ka jylla.
Lyngba kane ka shithi ka HITO ka la pynpaw da kaba ong “ Ngi kyntu ïa phi ba phin bthah ïa baroh ki heh jong ki tnad sorkar bapher bapher ba ki ophisar kim dei ban pyndonkam bakla ïa ki kali sorkar na ka bynta ki kam shimet jongki kum ha kaba leit buh skul ïa ki khun, leit ïew leit hat ne kino kino ki kam shimet”.
Hooid ha kiwei kiwei ki jylla ruh ka don ka jingpyndonkam bakla ïaki kali sorkar hynrei la sngewdei ban dawa ba ha kane ka jylla Meghalaya dei ban pyndonkam tang ha ki kam sorkar beit.
Ka log kaei kaei kaba sngewthamula ba ka sorkar na ka por shaka por ka pynpaw ba kam don pisa ban siew ïa ka tulop ki nonghikai ne ban pynïaid ïa la ki jong ki Ambulance hynrei ïa ki kali sorkar la shah ban pyndonkam bakla namar ka umphniang la shu theh beit da ka pisa sorkar.
Kane ka jingïoh ban pyndonkam bakla ïa ki kali sorkar da ki nongtrei sorkar bad kiba haïing hasem jongki ka dei namar ym ju buh jingkheiñ satia da ki nongniah kali ne ym ju don logbook ban buh ïa tarik, por, jaka ba ka kali ka ïaid bad halor kane la kyntu ïa ka Chief Secretary ban pynmih hukum ba baroh ki tnad sorkar ki dei ban buh da ki logbook.
Hynrei ki don pat ruh ki heh sorkar kiba la shah ba kin pyndonkam ïa ki kali ba ki ïoh na ka sorkar katba ki mon. Na ka bynta kiba bun donkam ban buh beit da ka logbook ne ban phah thep petrol ne diesel hi ïa ki kumba 50 %. Kumta ka seng ka kyrmen ba ka CS kan shim khia ïa kane ka kam na ka bynta ka bha ka miat bad ban kham pynduna ïa ki jingpynlut phut ïa ka pisa sorkar. Kane ka long kat kum ka jingthoh ba la phah sha ka CS da u President bah Donbok Dkhar bad General Secretary bah Wanbun N Dkhar.
