Jowai, Naiwieng 13: Ka Hynñiewtrep Integrated Territorial Organization (HITO) Jowai Circle ha ka sngi Baar ka la phah da ka jingujor sha ka ophis State Project Director, SEMAN-SSA & Director of School Education Literacy Shillong lyngba ka District Mission Co-ordinator SSA West Jaiñtia Hills District, halor ka jingpyndonkam bakla ïa ka skul SSA Building kaba don ka Mynthong da ka Q.C Springside Higher Secondary School, Jowai.
Ïa kane ka mat, ka seng ka la shim hadien ba ka la ïoh ka jingujor na ki katto katne ngut ki nongshong shnong halor ka ka skul Bulding kaba dang hap hapoh ka jingpeit ka skhim SSA.
U President ka seng u samla Owansaki Paswet ha ka jingkren bad ki lad pathai khubor ula ong ka jingpynlong skul da ka Q.C Springside Higher Secondary School, Jowai ha ka Building jong ka SSA ka la long kum ka jingbamsap, kumta ka seng ka kynthoh jur ïa kane ka jingleh beaiñ.
U la ong ka seng ka dap da ka jingsngewkhia namar ka Sorkar Pdeng ka la mang ban tei ïa ka building na ka bynta ki khynnah kiba wan na ki longïing baduk, hynrei sngewsih ban lap ba ïa ka building la pyndonkam da ki riew shimet, ki riewshim kabu ban buh da ka Q.C Springside Higher Secondary School Jowai kaba dei ka Private School bad ka Hostel.
Ka seng ka la ther tyngeh bad ka la dawa na ka DMC ban phah tohkit khnang ban lap ïa kiba donkti.
Ka seng kan sa ap ïa ka kaiphod jingtohkit namar lada lap shisha ba pyndonkam bakla ïa ka skul, ka seng kam banse ban ujor beit beit sha ki bor ka aiñ.
