Nongpoh, Nailur 28: Nalor ka kam ba ki nongtrei Accredited Social Health Activist (ASHA) ki shakri ban ïarap ïa ka tnad ka koit ka khiah wat ha ka jingsiew ba rit eh ba ki shem jingeh wat ban pyndap ïaki jingdonkam haïing hasem, ki nongtrei ASHA Umsning Association Unit da ka mon sngewbha mynta ka sngi kila mih shakhmat ban shim ïaka sienjam ban pynkhuid ïa ka Umsning baroh kawei da ka jingangnud ban wanrah ïa ka khuid ka suba namar ba phuh syntiew lut da ki plastik harud surok.
Ïa katei ka jingpynkhuid ki ASHA ha Umsning la snohktilang ruh da ka seng RAWA, ka CBTC Guwahati bad kumjuh ruh ki bor shnong ryngkat ka Umsning Town Dorbar ha kaba u Bah Rocky Kylla Chairman ka Umsning Town Dorbar u la wan ban plie ïa katei ka prokram kum u kongsan, u Bah Rocky Marwein Rangbah Shnong Umsning Proper B kum u Symbud kongsan, haka jingdonlang u Dr K Khongsdam Doctor Incharge ka Umsning CHC, ki nongmihkhmat naka Swacch Bharat Mission ba kynthup ïa u Kynjoh Rangtong Block Coordinator ka Umsning, Garland Sun Block Co-Ordinator Bhoirymbong bad kiwei kiwei.
Haba kren ha katei ka sngi naka liang u Bah Rocky Kylla kum u kongsan bad u Bah Rocky Marweiñ kum u symbud kongsan kila ai ka jingïaroh ïaki ASHA kiba la shim ïaka sienjam ban pynkhuid ïaka thaiñ Umsning da ka jingangnud ban wanrah ka khuid ka suba kumba ka jingjaboh kala long kaba shyrkhei bad ki surok kila satah satang da ki plastic naka jingkhlem akor jong ki paidbah nongleit nongwan.
Kila kyrpad ruh ïaki paidbah ha ka thaiñ Umsning bad kumjuh ruh kiba wan nabar ba ki dei ban don ka jingkitkhlieh ha kaba ïadei bad ka khuid ka suba ban wanrah ka jingitynnad khamtam ïaka jingkoit jingkhiah.
