Ba phi jied ïa nga uba na ka party kaba synshar ha Delhi phi pahuh kam pynroi: Sanbor

Shillong, Jymmang 21: U MLA ka South Shillong Constituency, u Bah Sanbor Shullai ha ka sngi Saitjaiñ u la ong ba ka jingstad ki paidbah ka Laban ban jied ïa u MLA ha kane ka kynti ba mynta ka pynlong ïa ki ban ïoh skhim pahuh wat ha shuwa ba kiwei ki MLA na kiwei ki party kin ïoh skhim na ka Smart City Project.
Haba kren ha ka jingïalang ban pynlait paidbah ïa ka skhim ba u la lah ban pynïoh mang tyngka na ka Shillong Smart City Project bad kumjuh ka MLA scheme ne Special Urban Work Programme, bad ki skhim na ki tnat bapher bapher kiba u la ïoh na bynta ka Laban Constituency ha kaba lada kheiñ lang ka poi T.12,27,61,300, u Bah Sanbor u la ong “dei ba phi jied ïa ka BJP phi ïoh pahuh ki skhim katne katne namar tang shu phah ïa ka jingpan jingmynjur na Delhi u Modi wut wut u ai”.
“Phi tip ba ha Delhi ym dei ba synshar ka UDP ne ka NPP ne ki Prah ki KHNAM hynrei ka BJP bad phi da pyndonkam hok ïa ka bor jabieng ban jied bad mynta phi ïohi shikhung bah ki skhim ngi ïoh ban pynlait bad kin dang bun shuh shuh kiba kum kine,” u la bynrap.
U Bah Sanbor u la ïathuh ba ïa kine ki skhim ba la pyllait, ki kynthup ïa ka jingshna pynitynnad ïa ki shnong ki thaw, ka jingpyndait ïa ki bording elektrik da ki LED Solar ka jingpyndait ïa ki CCTV bad kiwei kiwei.
U Bah Sanbor u la ïathuh ba na ka bynta ka jingpun jynkieng nalor jong ki nala la mang hapoh ka skhim Urban Smart City 2022-2023 kaba long kumba T.5 klur. Na ka bynta ban pyndait ïa ki 100 tylli ki MS Solar LED Street Lights la mang hapoh ka skhim SUWP 2022-2023 kaba ka jinglut ka long T.20 lak.
Shuh shuh u la ong ba na ka bynta ban shna ïa ka surok PDW lyngba ka SPA skhim 2022-2023 la mang kumba T.7 klur tam. Ha kaba ïadei bad ka jingshna ïa ka surok kaba pynïasoh naduh ka surok PWD lyngba ka Mynsain Forest Road ha LHS shaduh shajan ka iingsah jong u Deb Das Chakraborty ha Lumparing, Shillong, la mang haduh T.1 Klur.
Na ka bynta ka jingshna ïa ki surok kiba lah ban pynïasnoh ban ïaid sha ki kyndong kynshrot naduh ka surok PWD kaba la don lypa, kan sdang naduh ka iingsah jong u Dr. Merybell Marbaniang shaduh ka iingsah jong u Bah Rolet Rynjah bad kiwei kaba don ha Madan Laban, Shillong bad ka jinglut kan long haduh T.1 klur tam.
U la ïathuh ba na ka bynta ban shna ïa ka jingpun jynkieng na shilliang sha shilliang ka surok Kenche’s Trace naduh Bishnupur Taxi Stand kynthup ïa ka jingpynïasoh surok shaduh Bethesda Hospital Upper Kenche’s Trace, Shillong , ïa kane la mang kumba T.2 klur tam
Ha kaba ïadei ban pynbha ïa ki surok kumjuh ban siang rong kaba naduh ka K.T. ROAD shaduh quarter jong ka sorkar kaba don hajan ka Sanker Dev College Women’s Hostel, Shillong, la mang kumba T.7 lak bad kiwei kiwei.
“Ki kam pynroi kiba sahteng da ki 40 snem kiba ym ju don ba lah ban pynurlong hynrei ynda long MLA ma nga ki bu kiba nga la lah ban pyndep bad ngin ïai trei shitom ruh ban wanrah shuh shuh kiba kum kine,” ong u Bah Sanbor.
“Nga sngew lyngngoh shisien pyrkhat ba wat la nga la leh kat kine ki kam hynrei dang don pat kiba ym kyrshan ïa nga bad kine ki la dei kiba haram ïa u nongleh bha kaba long pyrshah ïa ka hukum ki jingngeit niam bad ki kot bakhuid baroh hynrei la jar katta ngan ïai trei shitom na bynta baroh,” u la bynrap.
Ïa katei ka song pisa la pyllait paidbah ha ka jingïalang kaba la long ha Assam Club, Laban Shillong ha ryngkat ka jingïadonlang ki Rangbah Shnong, ki Sengkynthei ki Committee bapher bapher bad ha katei ka sngi ka la don ruh ka jingpynkupburom ïa ki rangbah Shnong, ki nongsynshar shnong, ki Rangbah Shnong kiba rim bad kiwei kiwei.