Mawkyrwat, Rymphang 15: Ka Hynñiewtrep Youth Council (HYC) jong ka South West Khasi Hills District ha ka sngi saitjaiñ jong ka taïew ka 14 tarik u Rymphang, 2026 ka la pynlong ïa ka program pynkup ïa u Ïalamlynti Rngaid uba u dei uwei na ki samla rangbah ba nyngkong eh napoh ka South West Khasi Hills District ban pass ïa ka AFC ‘C’ Licence na ka All India Football Federation.
Ha kane ka sngi pynkup burom u bah Pynskhem Kharjahrin uba dei u President ka HYC South West Khasi Hills District haba ai jingkren ula ai jingkitbok kitrwiang bad pynpaw ka jingsngewkmen ïa ka jingtrei shitom jong une samla uba la ïoh kheit ïa u soh ka jingjop, wat la u dei ban ïaid shibun ki jingeh khamtam ba u wan na ka longïing longsem ba duna ka ïoh ka kot.
Shuh shuh u la ai mynsiem ruh ïa u Ialam ba un nangtrei shitom shuh nangne shakhmat ba un nang kynjoh sa ha kiwei pat ki kyrdan. “Lyngba ka jingïoh jong u ïa kane ka AFC ‘C’ Licence kan long ka lad ban ai mynsiem ïa kiwei ruh ki samla kiba don jingthmu ban pyndep ïa kum kine ki license”, ong u President ka HYC bad ym tangkata, ka long ruh ka burom ïa ka South West Khasi Hills District hi baroh kawei.
Kiwei de kiba la ïa donlang ki kynthup ïa u bah Ialamlynti Rngaid uba la shah pynkup burom ha ryngkat ki dkhot ka HYC South West Khasi Hills District.
