Shillong, Jylliew, 14: Ka Ingbishar Meghalaya High Court ha ka sngi Baar ka la bthah ïa ki bor synshar District ba kin shim ïa ki lad ki lynti ban pynthikna ïa ka jinglehkhuid leh suba ha kaba ïadei bad ka jingdie ïa ka doh ha ki dukan kiba don harud surok.
Ha ka jingshong bishar ïa ka PIL ba la ujor da ka Gau Gyan Foundation, ki arngut ki nongbishar kiba kynthup ïa u Chief Justice Sanjib Banerjee bad u Justice W. Diengdoh ki la ong, ka jingot ïa ka doh jong ki mrad lane ban mait ïa ka khlieh jong ki mrad bamdoh ha ki dukan harud surok ka long kaei kaei kaba pynsngewkhia ïa ki nongpeit.
“Ngi kyrmen ba ka Sorkar kan shim ïa ki lad ki lynti halor kane, ban pynthikna ïa ka jingleh khuid,” ong ka jingbthah jong ka ingbishar.
Ka sorkar jylla ha ka jubab (affidavit) ka la pyntip ba ka la shim ïa kiba bun ki lad ki lynti ban pynthikna ba kan ym don kano kano ka jingleh pynïap beaiñ ïa ki mrad bamdoh.
Ka Ingbishar ka la ong ba ki nongmudui ki la ban ai ïa ki jingpynshai halor ka jubab ba la ai da ka sorkar jylla naduh ba la pynmih ïa kane ka jingbthah.
Ka jingshong bishar halor kane ka kan sa long biang ha ka 5 tarik Naitung mynta u snem.
