Ba ngi ieid ïa ka jaidbynriew, ngi kyrshan ïa ka NPP ban ïalam ïa ka EC: Ronnie V. Lyngdoh
Shillong, Jylliew 19: U MDC jong ka Congress na Mylliem Constituency u Bah Ronnie V. Lyngdoh u la ong ba ka jingai jingkyrshan jong ka Congress ïa ka National Peoples Party (NPP) ban ïalam ïa ka Executive Committee kaba thymmai ha Khasi Hills Autonomous District Council ka long namarba ka Congress ka buh shwa ïa ka jaitbynriew hakhmat bad ban pyllait na ka jingpynjari da ka jingsynshar u Lat hapoh ka District Council.
Ha ka jingïakren bad ki lad pathai khubor ha ka Lah Sngi u Blei, u Bah Ronnie u la kynthoh pyrshah ruh ïa u Chief Executive Member (CEM) ba la shah pynhiar shuki jong ka Khasi Hills Autonomous District Council u Bah Titostarwell Chyne da kaba ong ba ka jingkren jong u ka long kum ka jingkren khyllung khynnah.
U la pynksan ruh ba ka jingïatreilang hapdeng ka INC bad ka NPP ka dei kaba la shim rai hi da ka Party ym tang ma u marwei shimet.
“Ngi pyrkhat ïa ka Council, lada ngim ai jingkyrshan ïa ka NPP kan wan ka jingsynshar u Lat. Kan kham bha ba ngi ïoh synshar hi ban lait na ka jingsynshar jong u Lat,” u la ong.
“Lada jia ba kan wan ka jingsynshar u Lat bad mynta kan wan sa ka jingpynbeit thymmai ïa ka Khyrnit Bahynriew, baroh khoit ki don hakhmat, lada ngim don bynta ha ka jingpynbeit thymmai, ïoh ba ki wanrah ha Parliament ïa ka Amendment, lada ka wan ka jingsynshar u Lat mano ban peit ïa ka bha ka miat jong ka khyndew ka shyiap, ka riti ka dustur, hato kan ym ktah? Dei halor kata ka nongrim ba ngi shim ïa ka rai ban ai jingkyrshan lada ki wanrah ïa ka jingpynbeit thymmai hapoh ka Parliament ïa ka Khyrnit Bahynriew ngin ïadon bynta ban ai jingmut bad ïa kiba ïahap ngin kyrshan bad ïa ki bym ïahap ngin pyrshah,” la pynshai u Bah Ronnie.
“Lada ka don kano kano ka party kaba buh shwa ïa ka jaidbynriew hakhmat, ngi kloi ban ïatreilang,” la bynrap u Bah Ronnie.
Ha kaba ïadei bad ka jingbate shuki Executive Member hapoh ka Council, u Bah Ronnie u la ong, “ngi ieh ha u CEM, namarba ma ki (NPP) ki don 12 ngut bad ma ngi (Congress) ngi don 6 ngut. Ka shong ka jingstad jong u CEM. Lada ngi don ne ngim don hapoh ka EC ruh ngin peit ba ka District Council bad khamtam eh ïa ka jingkordor bad ka jingkongsan jong ka Khyrnit Bahynriew.”