Khliehriat, Nailar 31 : Ki dkhot jong ka Jaiñtia Srudents Union Southern Border Zone, mynta ka sngi ki la mih bad maramot hi ïa ka surok kaba la twa kaba la buh jingeh haduh katta katta ïa ki nongleit nongwan kiba ha ki thaiñ khappud hajan ka shnong Borghat, East Jaiñtia Hills District bad ong ruh ba kane ka jingtwa ka dei kaba la shu iehnoh da ka tnat Public Works Department kaba leh mynthi khlem pynkhuid ïa ka khyndew bad ki maw kiba twa ha surok mynta la bun bnai.
Ki nongïalam bad ki dkhot ka JSU Southern Border Zone ki pynpaw ka jingsngew khia halor ka jingbym shim khia ka tnat PWD bad ki sngewkhia ruh ïa ka jingkynduh jingeh ki paidbah ka thaiñ ha ka leit ka wan bad ka kit ka bah namar ka jingbym lait shuh ban ïaid ki kali na kane ka surok kaba don hajan Borghat bad lada ki kali ki ïaid ruh hynrei ka buh jingeh bad buh jingma, jingsyier haduh katta katta
La ong ruh ba ha ka jingshisha na ka liang seng ki lah dep pyntip bad kyrpad ïaka tnad PWD ban shimkhia ban pynbha bad pynkhuid ïa kane surok kaba don ka jingtwa hynrei katei ka tnat ba dei peit ka leh bym salia na kata ka daw ki dkhot ka seng ki la hap ban mih hi ban pynbha bad maramot katba lah la ka bor tang ban long ban ïaid khnang ba ki paidbah ka thaiñ kin dup lait ban ïaid lynti katba long ei ban leit sha ïew sha hat bad ban leit donkam.
Ha kajuh ka por, ka seng ka dawa bad maham ïa ka tnat PWD ba nangne sha khmat ba kam dei ban lehklet bad leh mynthi hynrei kadei ban shimkhia bad pyrkhat lem ïaka jingeh ki paitbah ha ka leit ka wan ba dei ban pynkhuid noh mar mar hi khlem da buh teng, kane ka long katkum u kyrwoh ba la phah da u President JSU Southern Border Zone, u bah Ajoyminson Lyngdoh.
